Բիշքեկում Նիկոլ Փաշինյանի հետ հանդիպումից հետո Ռուսաստանի նախագահ Վլադիմիր Պուտինը լրագրողների հետ ճեպազրույցում մանրամասներ է հայտնել քննարկումներից՝ խոսելով նաև Հայաստանի եվրոպական ձգտումների, ՀԱՊԿ-ի հետ հարաբերությունների և Գյումրիի ռուսական ռազմաբազայի ապագայի մասին:
Պուտինը նշել է, որ հայ-ռուսական հարաբերությունների լարվածությունը սկսվել է Լեռնային Ղարաբաղի շուրջ զարգացումներից: Նա հիշեցրել է, որ 2022 թվականին Պրահայում Հայաստանի ղեկավարությունը ստորագրել է փաստաթուղթ, որով ճանաչել է, որ Ղարաբաղը Ադրբեջանի մաս է:
«Եթե Հայաստանը համարում է, որ ռուսական ռազմաբազան իրեն պետք չէ, մենք թեկուզ վաղը կհեռանանք»,- ասել է Պուտինը:
Նա նաև նշել է, որ Հայաստանի մերձեցումը Եվրամիությանը ինքնիշխան որոշում է, սակայն ԵՄ-ին և ԵԱՏՄ-ին միաժամանակ անդամակցելը հնարավոր չէ:
Պուտինը հրավիրել է Փաշինյանին Մոսկվա՝ քննարկելու հայ-ռուսական համագործակցության բոլոր ուղղությունները:
Աղբյուր՝ www.azatutyun.am
