ՕՊԵԿ+-ը նախատեսում է սեպտեմբերից հետո դադարեցնել նավթի արդյունահանման քվոտաների ավելացումը, քանի որ շարունակում է գնահատել Իրանի հետ պատերազմի արագ փոփոխվող ազդեցությունը համաշխարհային առաջարկի վրա, Bloomberg-ին հայտնել են երկու պատվիրակներ:
Նրանց խոսքով՝ արտադրողների դաշինքը ներկայում նախատեսում է մոտ ժամանակներս կայանալիք վիրտուալ նիստում հաստատել արդյունահանման քվոտայի օրական 188.000 բարելով ավելացումը: Դա կավարտի ներկայիս ավելացումների փուլը, և այս տարվա ընթացքում նոր բարձրացումներ չեն նախատեսվում:
Միևնույն ժամանակ պատվիրակներից մեկը նշել է, որ այս ծրագիրը կարող է փոփոխվել՝ կախված իրավիճակի զարգացումներից:
Նավթ արտահանող երկրների կազմակերպությունը արդեն մի քանի ամիս աստիճանաբար մեծացնում է իր անդամներին թույլատրված արդյունահանման ծավալները և դեռ մայիսին հաստատել էր ժամանակացույց, որը նախատեսում էր քվոտաների բարձրացումը շարունակել մինչև սեպտեմբեր:
Սակայն գործնականում պատերազմը այդ քայլերը մեծապես խորհրդանշական է դարձրել, քանի որ խմբի Մերձավոր Արևելքի առանցքային անդամները ստիպված են եղել կրճատել արդյունահանման և արտահանման զգալի ծավալներ:
Հակամարտության ընթացքում լարվածության և հարաբերական դադարների հերթագայության պայմաններում նավթի գները շարունակում են մնալ խիստ տատանողական: Անցած շաբաթ Brent տեսակի նավթի ֆյուչերսների գինը գերազանցել էր 100 դոլարը մեկ բարելի դիմաց, սակայն ԱՄՆ-ի և Իրանի միջև ռազմական գործողությունների դադարից հետո կրկին իջել էր 90 դոլարից ցածր:
Հակամարտության ընթացքում Թեհրանը հարձակվել է Հորմուզի նեղուցով անցնող նավթատար տանկերների վրա, ինչը անորոշություն է ստեղծել մատակարարումների շուրջ և բարդացրել ՕՊԵԿ+-ի որոշումները արդյունահանման ծավալների վերաբերյալ՝ ուժեղացնելով նավթի գների տատանումները:
Սաուդյան Արաբիայի էներգետիկայի նախարարությունը չի արձագանքել մեկնաբանության հարցմանը, իսկ ՕՊԵԿ-ում նույնպես չեն պատասխանել հեռախոսազանգին:
Աղբյուր՝ b24.am
