Հայաստան Նիկոլ Փաշինյանը նշանակվեց վարչապետ օգոստոս 02, 2026։ Նախագահ Վահագն Խաչատուրյանը ստորագրեց Նիկոլ Փաշինյանին վարչապետ նշանակելու մասին հրամանագիրը։ Հրամանագրի տեքստը հրապարակված է Հայաստանի նախագահի պաշտոնական կայքէջում։
Ավելի վաղ նախագահն ընդունել էր Կառավարության հրաժարականը, որը նորընտիր խորհրդարանի առաջին նստաշրջանի մեկնարկին ներկայացրել էր վարչապետ Նիկոլ Փաշինյանը՝ համաձայն Սահմանադրության պահանջի։
«Քաղաքացիական պայմանագիր»-ը, որպես Ազգային ժողովում խորհրդարանական մեծամասնություն ձևավորած քաղաքական ուժ, վարչապետի պաշտոնում առաջադրեց կուսակցության առաջնորդ Նիկոլ Փաշինյանին։
«ԱԺ «Քաղաքացիական պայմանագիր» խմբակցության ներկայացմամբ, Հանրապետության Նախագահի հրամանագրով՝ նշանակվեցի ՀՀ վարչապետ», - Ֆեյսբուքում գրել է Նիկոլ Փաշինյանը՝ հրապարակելով նաև տեսանյութ։
Նախագահը հրամանագիրն ստորագրել է՝ իր նստավայրում հյուրընկալելով վարչապետի պաշտոնակատարին։
«Ինձ համար մեծ պատիվ է Հայաստանի Հանրապետության Սահմանադրության 149-րդ հոդվածի այս հնարավորության համար՝ ստորագրել հրամանագիր Ձեզ Հայաստանի Հանրապետության վարչապետի պաշտոնում նշանակելու վերաբերյալ», - նշել է նախագահը։
Նիկոլ Փաշինյանը շնորհակալություն է հայտնել և հայտարարել, որ 2018 թվականին, երբ ստանձնեց վարչապետի պաշտոնը, դժվար կլիներ կանխատեսել, որ նրանք այսպիսի ճանապարհով կանցնեն։
«Հույս ունեմ, որ 9-րդ գումարման Ազգային ժողովն ի վերջո կդառնա այնպիսի հարթակ, որը քաղաքական գաղափարների, մտքերի, տեսլականների և ոչ թե անձանց բախման միջավայր կլինի», - ասել է վարչապետը։
«Պետության կայունությունը, ամրապնդումը, ամրությունը կախված է ոչ միայն քաղաքական մեծամասնությունից, այլև ընդդիմությունից», - ընդգծել է Վահագն Խաչատուրյանը։
Աղբյուր՝ www.azatutyun.am
