Կալանավորված ԲՀԿ առաջնորդ Գագիկ Ծառուկյանին պատկանող մի շարք ընկերությունների աշխատակիցներ այսօր բողոքի ակցիաների են դուրս եկել՝ պետական մարմիններից պահանջելով բացել կապարակնքված դռներն ու թույլ տալ իրենց շարունակել աշխատել:
Երկուշաբթի՝ Ծառուկյանի ձերբակալությանը զուգահեռ խուզարկություններ էին նրան պատկանող բազմաթիվ ընկերություններում: Այնտեղից իրավապահները փաստաթղթեր ու համակարգիչներ առգրավեցին, դռներն էլ կապարակնքեցին:
Այսօր իրենց աշխատանքն էին պահանջում վերականգնել «Մուլտի Վելնես»-ի, «Եվրոմոթորս»-ի, ինչպես նաև «Օլիմպավան» մարզական կենտրոնի աշխատակիցներն ու մարզվողները:
Ըստ մեքենաների վաճառքով ու սպասարկմամբ զբաղվող «Եվրոմոթորս»-ի տնօրեն Աբրահամ Դանագուզյանի՝ քննիչներն առգրավել են իրենց երեք սերվերները՝ խզելով կապը միջազգային գործընկերների հետ:
«Մեր լրիվ աշխատանքը խաթարված է, ո՛չ կարող ենք պատվերներ անել, ո՛չ վաճառել», - պատմել է Դանագուզյանը՝ հավելելով, որ կալանքի տակ են հայտնվել նաև իրենց հաճախորդների 17 մեքենաները, որոնք այդ պահին ընկերությունում են եղել՝ սպասարկման նպատակով:
«Օլիմպավան» մարզական կենտրոնում են մարզվում տարբեր մարզաձևերի հայաստանյան և արտասահմանյան հավաքականներ:
ММА-ի մարզիչ Էրիկ Օհանյանի փոխանցմամբ՝ իրենց հավաքականում ընդգրկված մոտ 100 երեխաներ մեկ շաբաթ է զրկված են նորմալ պայմաններում մարզվելու հնարավորությունից, ստիպված բացօթյա պարապմունքներ են անում, այնինչ ММА-ի դեպքում մարզումը տատամիի վրա է:
«Մուլտի Վելնես»-ի աշխատակիցներն էլ ընդգծում էին, որ շատերը տան վարձը տալու, օրվա հացի խնդիր ու վարկեր ունեն, սակայն իրենց անհասկանալի պատճառներով հարկադիր պարապուրդի են մատնված:
Իրավապահները կապարակնքել էին նաև Ծառուկյանին պատկանող «Արարատցեմենտ»-ը, սակայն հինգշաբթի օրը՝ աշխատակիցների բողոքի ակցիայից հետո, նրանց թույլատրեցին վերսկսել աշխատանքը:
Քննչական կոմիտեն Ծառուկյանին մեղադրում է առանձնապես խոշոր չափերով խարդախություն և փողերի լվացում կատարելու մեջ: Մեղադրանքն առնչվում երկու տարի առաջ բացված Իրանի առևտրի կենտրոնին, որտեղ ներկայացված պետք է լինեին իրանական շուկայի խոշորագույն արտադրողները՝ նավթի, գազի, դեղագործության ու շինարարության ոլորտներում: Առևտրի կենտրոնի ծրագիրը տապալվել է, իրավապահներն էլ պնդում են, թե Ծառուկյանը կազմակերպել և ղեկավարել է հանցավոր խումբ, որը Իրան-Հայաստան լոգիստիկ կապեր ստեղծելու պատրվակով, խաբեությամբ ու փաստաթղթեր կեղծելով, իրանական ընկերություններից հափշտակել է 52 միավոր տրանսպորտ, տեխնիկա և ապրանքներ՝ պատճառելով շուրջ 22 միլիոն դոլարի վնաս:
Մինչդեռ Ծառուկյանը պնդում է, որ ի՛նքը պետք է այս գործով տուժող ճանաչվի:
Աղբյուր՝ www.azatutyun.am
