Կալանավորված գործարար Գագիկ Ծառուկյանի ընտանիքին պատկանող մի շարք խոշոր ընկերություններ արդեն ուղիղ մեկ շաբաթ է՝ չեն աշխատում, աշխատակիցներն, ըստ էության, հարկադիր պարապուրդի մեջ են. այսօր «Արարատի» կոնյակի, գինու և օղու կոմբինատի աշխատակիցները հավաքվել էին ընկերության կապարակնքված դռան առջև՝ պահանջելով թույլ տալ վերսկսել աշխատանքը:
«Ուղիղ մեկ շաբաթ է՝ մենք այս անորոշ վիճակում ենք, անհասկանալի, չենք հասկանում՝ ինչ է կատարվում», - ասաց նրանցից մեկը:
Գործարանի հարյուրավոր աշխատակիցներից Գայանե Իսպիրյանը, որն աշխատում է շշալցման արտադրամասում անցած երկուշաբթի տեղի ունեցած իրադարձություններն իր աչքերով է տեսել. առավոտ շուտ իրավապահները եկան ու իրենց թույլ չտվեցին ներս մտնել: Կինը պնդում է՝ թող իրավապահները քննություն անցկացնեն՝ առանց ընկերության աշխատանքը դադարեցնելու:
Այս ընկերությունում արդեն 20 տարի աշխատող Ժասմենա Վեզիրյանը շուրջ 200 հազար դրամ աշխատավարձ է ստանում, ամուսինն առողջական խնդիրների պատճառով չի աշխատում, տանը խնամում են նաև իր 90-անց սկեսրայրին՝ իր ու որդու աշխատավարձով:
«Վաղը բանկի օրն է, ո՞վ է վճարելու մեզ, մենք խնդիրներ կունենանք, դրա համար խնդրում եմ մեր վարչապետին՝ ուղղակի այս հարցին շուտ լուծում տա, մենք ընդամենը մեր աշխատանքն ենք ուզում», - ասաց նա:
Աշխատավարձերը թեև մինչ իրավապահների գործողությունները հասցրել են ստանալ, սակայն դեռ գումար պետք է փոխանցեն իրենց:
Երևանի «Արարատ» կոնյակի, գինու և օղու կոմբինատը Հայաստանի խոշոր հարկատուների ցանկում 2025-ի տվյալներով 357-րդն է՝ վճարած շուրջ մեկ միլիարդ դրամի հարկերով. իրավապահները գնացին ոչ միայն այս, այլև Ծառուկյաններին պատկանող մի շարք այլ ընկերություններ ու կապարակնքեցին դռները:
«Մուլտի Սթոուն» ընկերության աշխատակիցներն այսօր նույնպես հավաքվել էին՝ պատասխաններ պահանջելով. ե՞րբ կկարողանան աշխատանքի վերադառնալ:
Չի գործում նաև 2025-ի տվյալներով Հայաստանի 80-րդ ամենամեծ ընկերությունը՝ «Փարավոն» ռեստորանը՝ շուրջ 4.5 միլիարդ դրամ վճարած հարկերով. այսօր ռեստորանի ու հարևանությամբ գործող «Մուլտի Գրանդ» հյուրանոցի աշխատակիցները նույնպես ակցիա իրականացրին:
Պահանջը նույնն է՝ վերաբացել ընկերությունները:
Անցած շաբաթ կանգնել էր նաև Արարատի ցեմենտի գործարանի արտադրությունը, սակայն աշխատակիցների բողոքի ակցիայից հետո կառավարության միջամտությամբ թույլատրեցին վերսկսել աշխատանքը:
Այսօր Պետական եկամուտների կոմիտեն Ծառուկյաններին պատկանող գործարանում հարկերից խուսափելու դեպքերի մասին է հայտարարել. հարկային մարմինը պնդում է, թե պետությանը ավելի քան 400 միլիոն դրամի վնաս են հասցրել:
Աղբյուր՝ www.azatutyun.am
