Բրյուսելը մտադիր է Հայաստանի համար մաքսային արտոնյալ ռեժիմ սահմանել, որը հնարավորություն կտա Հայաստանից արտահանվող ապրանքների շուրջ 80 տոկոսն առանց մաքսատուրքերի եվրոպական շուկաներ հասցնել:
«Սրանով մենք կարող ենք վերաուղղորդել այն ապրանքները, որոնք մեծապես ռուսական շուկա են արտահանվում, և դրանք ուղարկել Եվրոպական միության միասնական շուկա՝ 450 միլիոն մարդկանց համար», - հայտարարեց ֆոն դեր Լայենը:
Խոսքը առևտրի ինքնավար միջոցառումների՝ Autonomous Trade Measures-ի կամ ATM-ի մասին է, այս պահին նման ռեժիմով եվրոպական երկրների հետ առևտուր է իրականացնում Մոլդովան:
Ռուսաստանի կողմից հայկական ապրանքների ներկրման արգելքի ֆոնին Բրյուսելի այս մտադրությունը, սակայն, կյանքի կկոչվի միայն դրա վերջնական հաստատումից հետո:
Նիկոլ Փաշինյանը հույս հայտնեց, որ դա հնարավոր է իրագործել հնարավորինս շուտ:
«Լիահույս եմ, որ ԵՄ և ԵՄ անդամ պետությունների, մյուս կառույցների գործընկերների հետ ակտիվ աշխատանքի միջոցով կկարողանանք կարճ ժամկետներում ավարտել որոշման ընդունման գործընթացը», - նշեց վարչապետը:
Այս ընթացքում ռուսական սահմանափակումներին ի պատասխան՝ Բրյուսելը նախ 52 միլիոն եվրոյի աջակցության մասին հայտարարեց:
«Այս ֆինանսավորումը կարող է օգնել ստեղծել արտահանման խթանման գործակալություն, որպեսզի հայկական բիզնեսների արտահանման հզորությունները խթանվեն», - ասաց Եվրահանձնաժողովի նախագահը:
Աղբյուր՝ www.azatutyun.am
