Չինական արհեստական բանականության Z.ai ընկերության բաժնետոմսերը երկուշաբթի ընկել են ավելի քան 10%-ով այն բանից հետո, երբ ընկերությունը հայտարարեց շուրջ 5 մլրդ դոլարի նոր ներգրավման ծրագրի մասին։ Գործարքը կազմված է բաժնետոմսերի տեղաբաշխումից և փոխարկվող պարտատոմսերի թողարկումից և Z.ai-ի համար դարձել է վերջին երկու ամսվա ընթացքում երկրորդ խոշոր ներգրավումը։
Պեկինում տեղակայված ընկերությունը նախատեսում է թողարկել մինչև 21.97 մլն նոր բաժնետոմս՝ յուրաքանչյուրն HK$714 գնով։ Այս տեղաբաշխումից համախառն մուտքերը կարող են կազմել մոտ HK$15.68 մլրդ, կամ շուրջ $2 մլրդ։ Տեղաբաշխման գինը 10% զեղչով է ընկերության ուրբաթ օրվա փակման՝ HK$793 գնից։
Առանձին գործարքով Z.ai-ը մտադիր է թողարկել 20.14 մլրդ յուան, կամ $3 մլրդ, զրոյական կուպոնով փոխարկվող պարտատոմսեր, որոնց մարումը նախատեսված է 2027 թվականին։ Պարտատոմսերը սկզբնական փուլում կփոխարկվեն HK$892.50 գնով մեկ բաժնետոմսի դիմաց, ինչը 12.5% հավելավճար է ուրբաթ օրվա փակման գնի նկատմամբ։
Ընկերության խոսքով՝ ներգրավված միջոցները կուղղվեն հաջորդ սերնդի AI մոդելների զարգացմանը, այդ թվում՝ հետազոտություններին և մշակումներին, ուսուցման և inference ենթակառուցվածքին, ինչպես նաև առևտրայնացմանը։
Ներկայիս գործարքը հաջորդում է հուլիսին իրականացված շուրջ $4 մլրդ բաժնետոմսերի տեղաբաշխմանը։ Այսպիսով, Z.ai-ը երկու ամսում արդեն երկրորդ անգամ է շուկա դուրս գալիս խոշոր կապիտալ ներգրավելու համար։
Անցած ամիս ընկերության բաժնետոմսերը կտրուկ աճել էին այն բանից հետո, երբ Z.ai-ը ներկայացրել էր նոր AI մոդել, որը, ընկերության պնդմամբ, ամբողջությամբ աշխատում է Չինաստանում արտադրված չիպերով։ Ընկերությունը նաև հայտարարել էր, որ մոդելի առցանց հարցումները սպասարկելու համար օգտագործել է 100,000 տեղական արտադրության չիպ։
Z.ai-ի տեղական մրցակից MiniMax-ի բաժնետոմսերն էլ երկուշաբթի նվազել են՝ մոտ 5%-ով։
Աղբյուր՝ www.cnbc.com
