Volkswagen-ը պատրաստում է մոտ 16 մլրդ եվրոյի վերակազմավորման ծրագիր, որի նպատակը ծախսերի կրճատումն ու բիզնեսի արդյունավետության բարձրացումն է։ Spiegel-ը և Reuters-ը, հղում անելով աղբյուրներին, գրում են, որ կոնցեռնը քննարկում է խոշոր փոփոխություններ ինչպես աշխատուժի, այնպես էլ արտադրական հարթակների մասով։
Ըստ հրապարակումների՝ ծրագրի շրջանակում ամբողջ աշխարհում կարող է կրճատվել մինչև 60 հազար աշխատատեղ։ Ընդ որում, մոտ 10 մլրդ եվրո նախատեսվում է հատկացնել աշխատակիցներին վճարվող հատուցումներին և կրճատումների հետ կապված այլ ծախսերին։
Մնացած շուրջ 6 մլրդ եվրոն կարող է պահանջվել Գերմանիայում չորս ձեռնարկությունների հնարավոր փակման համար։ Խոսքը Էմդենում, Ցվիկաուում, Նեկարզուլմում և Հանովերում գտնվող գործարանների մասին է։ Աղբյուրների գնահատմամբ՝ Էմդենի և Ցվիկաուի գործարանների փուլային փակումը Volkswagen-ի համար կարժենա մոտ 1 մլրդ եվրո՝ յուրաքանչյուրի դեպքում, իսկ Նեկարզուլմում և Հանովերում արտադրության դադարեցումը՝ ևս 2-ական մլրդ եվրո։
Ընկերությունում նման քայլերի անհրաժեշտությունը կապում են Չինաստանի հետ աճող մրցակցության, բարձր մաքսատուրքերի և արտադրական հզորությունների ավելցուկի հետ։ Այդ պայմաններում վերակազմավորումը ներկայացվում է որպես գոյատևման և շահութաբերության պահպանման միջոց։
Handelsblatt-ի տվյալներով՝ Volkswagen-ը հաշվարկում է, որ վերակազմավորման արդյունքում մինչև տասնամյակի վերջ կկարողանա խնայել գրեթե 31 մլրդ եվրո։
Ավելի վաղ լրատվամիջոցները գրել էին նաև, որ VW-ի գործարաններից մեկը կարող է վերափոխվել հակաօդային պաշտպանության համակարգերի արտադրության համար։
Աղբյուր՝ b24.am
