Telcell-ը հայտարարել է, որ Ռուսաստանից հնարավոր է գումար փոխանցել անմիջապես Telcell Wallet-ին։ Ընկերության ներկայացմամբ՝ փոխանցված գումարը մուտքագրվում է ակնթարթորեն՝ առանց լրացուցիչ քայլերի և սպասելու։
Ծառայության համար սահմանվել են հետևյալ մուտքագրման սահմանաչափերը՝ մինչև 1,000,000 ֏ մեկ փոխանցմամբ, մինչև 5,000,000 ֏ օրական և մինչև 20,000,000 ֏ ամսական։ Telcell-ը նաև նշում է, որ Wallet-ում գումարի մուտքագրման համար միջնորդավճար չի գանձվում, սակայն փոխանցման պայմանները սահմանում է ուղարկող բանկը։
SberBank-ի դեպքում մեկ փոխանցման առավելագույն չափը կազմում է մինչև 50,000 ₽-ին համարժեք ՀՀ դրամ։ Միջնորդավճարը մինչև 3,000 ₽ փոխանցումների համար 30 ₽ է, իսկ 3,000 ₽-ից ավելիի դեպքում՝ 1%։ T-Bank-ի դեպքում, Telcell-ի հրապարակած տեղեկության համաձայն, առանց միջնորդավճարի կարելի է փոխանցել մինչև 20,000 ₽՝ ամիսը 1 անգամ, իսկ դրանից ավելի փոխանցումների համար գործում է 1% սակագին։
Փոխանցում իրականացնելու համար SberBank և T-Bank հավելվածներում անհրաժեշտ է ընտրել միջազգային փոխանցման տարբերակը դեպի «Армения», այնուհետև՝ փոխանցում հեռախոսահամարով, մուտքագրել ստացողի համարը 374 կոդով և բանկերի ցանկից ընտրել Telcell Wallet։ Դրանից հետո օգտատերը պետք է ստուգի գումարը, տվյալներն ու միջնորդավճարը և հաստատի գործարքը։
Telcell-ը հորդորում է գործող սակագները նախապես ստուգել համապատասխան բանկի հավելվածում, քանի որ վերջնական պայմանները սահմանում է հենց ուղարկող բանկը։
Աղբյուր՝ telcell.am
