Սիսիանի տարածքային մանկավարժահոգեբանական աջակցության կենտրոն» ՊՈԱԿ-ը 2026 թվականի հունվարին մրցույթ է հայտարարել 1998 թվականի արտադրության մարդատար ավտոմեքենա վարձակալելու համար։ «Հետք»-ի հրապարակման համաձայն՝ տեխնիկական պահանջները նախատեսում էին 101-116 ձիաուժ հզորությամբ, գազով և բենզինով աշխատող, չորստեղանոց «Opel»։
Հրապարակման մեջ նշվում է, որ մրցույթի նկարագրությունը գրեթե համընկել է Սիսիան համայնքի ավագանու «Քաղաքացիական պայմանագիր» խմբակցության անդամ Տիգրան Համբարձումյանին պատկանող մեքենայի տվյալների հետ։ Տիգրան Համբարձումյանը նաև պատգամավոր Կարեն Համբարձումյանի եղբայրն է։
Ըստ աղբյուրի՝ Տիգրան Համբարձումյանը 1998 թվականի, 116 ձիաուժ հզորությամբ «Opel»-ը գնել է 2025 թվականին՝ 300,000 դրամով։ Նույն մեքենայի վարձակալության համար ՊՈԱԿ-ի հետ կնքվել է 1 մլն 990 հազար դրամի պայմանագիր, ինչը նախահաշվային գնից 10 հազար դրամով պակաս է։
Մրցույթին հայտ է ներկայացրել միայն մեկ մասնակից՝ Տիգրան Համբարձումյանը։ Տեխնիկական բնութագրում նշվել է, որ մեքենան վարձակալվում է առանց վարորդի և պետք է օգտագործվի կենտրոնի մասնագետներին Սիսիան քաղաքի ու հարակից գյուղերի դպրոցներ և ՆՈՒՀ-եր տեղափոխելու, ինչպես նաև կենտրոնի այլ կարիքների համար։
Կենտրոնի տնօրեն Լիլիթ Դովլաթյանը «Հետք»-ին ասել է, որ այս մրցույթի տեխնիկական բնութագիրը 2016 թվականից չի փոխվել։ Սակայն հրապարակման մեջ հիշեցվում է, որ 2020 թվականի մրցույթում նշված էր այլ պահանջ՝ 122 ձիաուժ հզորությամբ «Mercedes-Benz C 180» կամ համարժեք մեքենա, ինչն այդ պնդումը հարցականի տակ է դնում։
Աղբյուր՝ panorama.am
