Սեպտեմբերի 15-ից 25-ը Հայաստան բնական գազի մատակարարումը «Հյուսիսային Կովկաս — Անդրկովկաս» մայրուղային գազատարով ժամանակավորապես կդադարեցվի։ Այդ մասին հայտնում է «Գազպրոմ Հայաստան»-ն։
Ընկերության հաղորդագրության համաձայն՝ դադարեցումը պայմանավորված է Ռուսաստանի Դաշնության տարածքում նշված գազատարի վրա նախատեսված կանխարգելիչ և վերանորոգման աշխատանքներով։
«Գազպրոմ Հայաստան»-ն նշում է, որ այդ ժամանակահատվածում հանրապետության սպառողների գազամատակարարումը կիրականացվի առանց սահմանափակումների՝ ներքին պահուստների և Իրանի Իսլամական Հանրապետությունից բնական գազի լրացուցիչ ծավալների հաշվին։
ՓԲԸ «Գազպրոմ Հայաստան»-ն ռուսական «Газпром» հոլդինգի 100% դուստր ընկերությունն է և Հայաստանի ներքին սպառման համար Ռուսաստանից բնական գազի մենաշնորհային մատակարարը։
Աղբյուր՝ arka.am
