Չինաստանի Շենչժեն քաղաքում անսովոր ծառայությունը վերածվել է եկամտաբեր ձեռնարկության։ South China Morning Post-ի փոխանցմամբ՝ տեղացի ձեռնարկատեր Չժան Սյաոցյաոն հաճախորդների մեջքը քորելու ծառայության հիման վրա ստեղծել է բիզնես, որի երկու գործող կետերը միասին ամսական ապահովում են մոտ 100 հազար յուան եկամուտ, կամ մոտ 15 հազար դոլար։ Նախագիծը, ըստ հրապարակման, արդեն հասել է ինքնածախսածածկման փուլին։
32-ամյա Չժան Սյաոցյաոն առաջին սրահը բացել է մայիսին, իսկ երկրորդը՝ արդեն մեկ ամիս անց։ Ծառայության ընթացքում հաճախորդները պառկում են մերսման սեղանների վրա, իսկ աշխատակիցները հատուկ մշակված արհեստական եղունգներով նրբորեն քորում են մեջքը և մարմնի այլ հատվածներ։ Մեկ ժամ տևողությամբ այս պրոցեդուրան արժե 300 յուան, որը մոտ 40 դոլար է։
Ձեռնարկատիրոջ գնահատմամբ՝ ծառայության նկատմամբ հետաքրքրությունը պայմանավորված է խոշոր քաղաքների բնակիչների բարձր սթրեսով։ Նրա խոսքով՝ պրոցեդուրան օգնում է թուլանալ, նվազեցնել լարվածությունը և կարգավորել քունը։ Քանի որ Չինաստանում նախկինում նման ձևաչափով բիզնես չի գործել, Չժանը ծառայության տեխնիկան ստիպված է եղել մշակել զրոյից։
Առաջին երկու կետերն արդեն շահույթ են բերում, և այժմ հիմնադիրը ծրագրում է արագ ընդլայնում։ Նրա նպատակը ամբողջ Չինաստանում մինչև 100 նման սրահ բացելն է և այս անսովոր ծառայությունը լիարժեք մասնագիտության վերածելը։ Չժանը նախատեսում է զարգացնել ցանցը ֆրանչայզինգի մոդելով և, իր խոսքով, ծառայությունների շուկայում նոր նշաձող սահմանել։
Աղբյուր՝ b24.am
