ԱՄՆ Արժեթղթերի և բորսաների հանձնաժողովը՝ SEC-ը, հոկտեմբերի 2-ին հաստատել է Cboe BZX-ի կանոնակարգային փոփոխությունը, որը թույլ է տալիս Volatility Shares-ի թողարկած վեց ETF-ների ցուցակումը։ Դրանցից մի քանիսը նախատեսված են bitcoin և ether-ի օրական եկամտաբերությունը եռապատիկ՝ 3x լծակով արտացոլելու համար, իսկ նույն շարքում ընդգրկված են նաև ոսկու, արծաթի, հում նավթի և բնական գազի վրա հիմնված ֆոնդեր։
Սա կարևոր քայլ է ամերիկյան կրիպտոշուկայում, քանի որ մինչ այժմ ԱՄՆ-ում կրիպտոֆոնդերի լծակային վերին սահմանը 2x էր։ Միևնույն ժամանակ, ֆոնդերը դեռ չեն կարող սկսել առևտուրը. դրա համար անհրաժեշտ է, որ SEC-ը ուժի մեջ մտցնի թողարկողի գրանցման հայտարարությունը, իսկ որոշման մեջ վերջնաժամկետ նշված չէ։
Ֆոնդերը չեն պահելու bitcoin կամ ether թոքեններ. դրանց հիմքում կլինեն այդ ակտիվների հետ կապված կարգավորվող ֆյուչերսներ։ Շուկայի մասնագետները շեշտում են, որ նման գործիքները նախատեսված են հիմնականում առևտրի, ոչ թե երկարաժամկետ ներդրման համար։ Bloomberg-ի ETF-ների ավագ վերլուծաբան Eric Balchunas-ը X-ում գրել է, որ լծակային ETF-ները նախատեսված են առևտրի, ոչ թե ներդրման համար։
Այսպիսի ֆոնդերը պետք է ամեն օր վերաբալանսավորվեն, որպեսզի լծակը պահպանվի 3x մակարդակում։ Դա նշանակում է, որ աճից հետո նրանք ստիպված են ավելի շատ ֆյուչերսներ գնել, իսկ անկումից հետո՝ վաճառել, ինչն, ըստ շուկայի մասնակիցների, կարող է ուժեղացնել ներսօրային տատանումները։ Բացի այդ, բազմօրյա եկամտաբերությունը կարող է էապես շեղվել հիմքում ընկած ակտիվի շարժի եռապատիկից և երբեմն նույնիսկ հակառակ արդյունք տալ։
Blockstream-ի գործադիր տնօրեն Adam Back-ը զգուշացրել է, որ ավտոմատ վերաբալանսավորվող բարձր լծակային ռազմավարությունները մեծ տատանողականության պայմաններում կարող են «այրել» կապիտալը։ Volatility Shares-ն էլ իր նախնական պրոսպեկտում նշել է, որ որքան ավելի տատանողական է հիմքային ցուցանիշը, այնքան մեծ է volatility decay-ի ռիսկը։ Երկարաժամկետ արդյունքների վրա ճնշում է ստեղծում նաև ֆյուչերսների «գլորումը», երբ ժամկետի ավարտին մոտ պայմանագրերը վաճառվում են և գնվում են ավելի ուշ ժամկետով, հաճախ ավելի թանկ պայմանագրեր։
Ընդհանուր առմամբ, SEC-ի որոշումը դիտվում է որպես ևս մեկ նշան, որ կրիպտոակտիվների շուկայում հայտնվում են այնպիսի նույնատիպ գործիքներ, որոնք վաղուց կիրառվում են ավանդական ակտիվների դեպքում։ Սակայն հոդվածում նշվում է, որ կարճաժամկետ սպեկուլյանտների համար դրանք կարող են օգտակար լինել, մինչդեռ երկարաժամկետ և ավելի զգուշավոր ներդրողների համար spot ETF-ները մնում են ավելի հարմար տարբերակ։
Աղբյուր՝ coindesk.com
