Իռլանդական լոուքոսթեր Ryanair-ի գլխավոր տնօրեն Մայքլ Օ'Լիրին հայտարարել է, որ հաջորդ տարի ավիատոմսերի գները կարող են «զգալիորեն» բարձրանալ, եթե նավթի գները շարունակեն մնալ բարձր մակարդակում։ Նրա խոսքով՝ ավիաընկերությունների վրա ճնշումը մեծանում է, քանի որ ավիավառելիքի արժեքը կտրուկ աճել է։
Reuters-ի փոխանցմամբ՝ ընկերության տարեկան ընդհանուր ժողովից առաջ լրագրողների հետ զրույցում Օ'Լիրին ասել է, որ հուլիս-սեպտեմբեր ընկած երկրորդ եռամսյակում գները, հավանաբար, շատ փոքր չափով կնվազեն, սակայն դեկտեմբեր և մարտ ավարտվող եռամսյակների գնային դինամիկան դեռևս անորոշ է։ Նա նշել է, որ եթե նավթի գները բարձր մնան նաև հաջորդ տարի, ավիատոմսերի սակագները կարող են զգալիորեն աճել, թեև ընկերությունը կցանկանար խուսափել այդ սցենարից։
Հինգշաբթի նավթի գներն աճել են Մերձավոր Արևելքում լարվածության սրման և էներգամատակարարման վրա դրա ազդեցության շուրջ մտահոգությունների ֆոնին։ Brent տեսակի նավթի գինը պահպանվել է մեկ բարելի դիմաց $100-ից բարձր, իսկ ԱՄՆ West Texas Intermediate տեսակի նավթի ֆյուչերսները բարձրացել են 1.4%-ով՝ հասնելով $97.4-ի մեկ բարելի դիմաց։
Նավթի թանկացումը կտրուկ բարձրացրել է նաև ավիավառելիքի գինը, որը ավիափոխադրողների հիմնական ծախսերից է։ International Air Travel Association-ի Jet Fuel Price Monitor-ի տվյալներով՝ սեպտեմբերի 4-ով ավարտված շաբաթվա դրությամբ ավիավառելիքի գինը կազմել է $171 մեկ բարելի դիմաց, ինչը 90%-ով բարձր է նախորդ տարվա միջին ցուցանիշից։
Ապրիլին Օ'Լիրին CNBC-ին ասել էր, որ տարվա ընթացքում ավելի թույլ եվրոպական ավիաընկերություններից մի քանիսը կարող են չդիմանալ, եթե ավիավառելիքի բարձր գինը շարունակի ճնշել ոլորտը։ Այդ ժամանակ Ryanair-ը հայտնել էր, որ ամառային սեզոնի համար ապահովագրել է իր ավիավառելիքի պահանջարկի 80%-ը։ 2027 թվականի համար ընկերությունն ապահովագրված է մեկ բարելի դիմաց $67 գնով, իսկ 2028 թվականի համար՝ իր պահանջարկի միայն 15%-ը՝ $85 գնով։
Լոուքոսթերի առաջին եռամսյակի շահույթը 34%-ով նվազել է այն բանից հետո, երբ սպառողները հետաձգել են ամրագրումները ԱՄՆ-Իրան պատերազմի՝ փետրվարի 28-ին սկսվելու ֆոնին։ Օ'Լիրին ավելի վաղ նշել էր, որ Մերձավոր Արևելքում հակամարտության պատճառով հաճախորդները զգուշավոր են դարձել, ինչի հետևանքով առաջին եռամսյակում տոմսերի գները նվազեցվել են՝ պահանջարկը խթանելու համար։
Աղբյուր՝ www.cnbc.com
