Պետական եկամուտների կոմիտեն հայտնել է, որ Կառավարության 2026 թվականի հոկտեմբերի 8-ի թիվ 1449-Ն որոշմամբ վերանայվել են օրինապահ հարկ վճարողի հավաստագրի տրամադրման չափանիշները և ներդրվել են նոր կարգավորումներ։ Փոփոխությունների նպատակը, ըստ ՊԵԿ-ի, ավելի բարենպաստ պայմանների ստեղծումն է, հարկային կամավոր կարգապահության խրախուսումը և հարկային մարմնի ու հարկ վճարողի գործընկերային հարաբերությունների ամրապնդումը։
Որոշմամբ մեղմացվել են հավաստագիր ստանալու մի շարք պահանջներ։ 2027 թվականի հունվարի 1-ից թույլատրելի իրավախախտումների հետևանքով առաջացած լրացուցիչ պարտավորությունների սահմանաչափը կկազմի ԱԱՀ-ով հարկման բազայի մինչև 0,1 %-ը, բայց ոչ ավելի, քան 10 մլն դրամը։ Ներկայում այդ շեմը 0,05 % է և առավելագույնը՝ 4 մլն դրամ։
Նույն ժամանակ սահմանվել է, որ հարկային հաշվարկները, հայտարարագրերը, հաշվետվությունները և այլ փաստաթղթերը ուշ ներկայացնելը, ինչպես նաև հարկերի, տուրքերի, վճարների և կանխավճարների ուշ վճարումը չեն խոչընդոտի հավաստագիր ստանալուն, եթե նման խախտումները արձանագրվել են ոչ ավելի, քան երկու անգամ։
Կառավարությունը սահմանել է նաև լրացուցիչ չափանիշներ։ 2027 թվականից հարկ վճարողը կկարողանա հավակնել օրինապահի կարգավիճակին, եթե դիտարկվող ժամանակահատվածում և նախորդող երկու հարկային տարիներին իր գործունեության արդյունքում հարկային վնաս չի ունեցել։ Բացի այդ, դիտարկվող ժամանակահատվածի կեսից ավելի ամիսների համար նա պետք է հաշվարկած լինի առնվազն երկու աշխատողի՝ նվազագույնից բարձր աշխատավարձ և աշխատավարձին հավասարեցված այլ վճարումներ։
Հավաստագիր ստանալու համար տնտեսվարողը նաև պետք է, իր գործունեության ոլորտից կախված, ունենա բոլոր պարտադիր լիցենզիաները, թույլտվությունները և արտոնագրերը։ Միաժամանակ, 2027 թվականի հունվարի 1-ից հավաստագիրը կտրամադրվի անժամկետ՝ ներկայիս մեկ տարվա փոխարեն, սակայն եռամսյակային մշտադիտարկման արդյունքներով դրա գործողությունը կարող է դադարեցվել։
ՊԵԿ-ի տվյալներով, հաջորդ տարվա սկզբից օրինապահ հարկ վճարողների համար կգործեն նաև ավելի բարենպաստ սպասարկման և հարկային վարչարարության պայմաններ։ Դրանց թվում են առաջնահերթ և անհատական սպասարկումը համապատասխան մասնագետի միջոցով, ինչպես նաև համալիր հարկային ստուգումների պլանավորման ժամանակ ռիսկայնությունը գնահատող չափանիշների նկատմամբ 0,8 գործակցի կիրառումը, ինչը պետք է նվազեցնի ստուգման ենթարկվելու հավանականությունը։
Աղբյուր՝ b24.am
