Տնտեսական համագործակցությունը Հայաստանի և Ֆրանսիայի ռազմավարական գործընկերության առաջնահերթ ուղղություններից է։ Այդ մասին նշվել է ՀՀ վարչապետ Նիկոլ Փաշինյանի և Ֆրանսիայի նախագահ Էմմանուել Մակրոնի հանդիպմանը, որը տեղի է ունեցել Ելիսեյան պալատում։
ՀՀ կառավարության մամուլի ծառայության հաղորդմամբ՝ Փաշինյանը Փարիզում է՝ առաջին Միջազգային տիեզերական գագաթնաժողովին մասնակցելու նպատակով։ Հանդիպման ընթացքում զրուցակիցները քննարկել են նաև երկկողմ համագործակցության խորացման հեռանկարները տիեզերական ոլորտում։
Վարչապետը նշել է, որ Հայաստանը շահագրգռված է այս ուղղությամբ Ֆրանսիայի հետ ավելի առարկայական գործընկերության ձևավորմամբ։ Կողմերը նաև ընդգծել են Հայաստանի կառավարության հետևողական քայլերը՝ տնտեսության դիվերսիֆիկացման ուղղությամբ։
Հանդիպմանը արձանագրվել է նաև, որ Բարգուշատի թունելի շինարարության աշխատանքներն անցել են գործնական փուլ։ Փաշինյանն ու Մակրոնը կարևորել են շինարարական աշխատանքների հնարավորինս շուտ մեկնարկը։
Ֆրանսիայի նախագահը շեշտել է երկկողմ հարաբերությունների հետևողական զարգացման կարևորությունը բոլոր ուղղություններով՝ հայ-ֆրանսիական ռազմավարական համագործակցության հռչակագրին համապատասխան։
Կողմերը քննարկել են նաև տարածաշրջանային գործընթացները՝ կարևորելով խաղաղության ամրապնդմանն ուղղված քայլերի հետևողական իրականացումը։
Աղբյուր՝ arka.am
