Հայաստանը շարունակում է հավատարիմ մնալ Եվրասիական տնտեսական միության շրջանակում փոխշահավետ համագործակցությանը։ Այդ մասին վարչապետ Նիկոլ Փաշինյանը հայտարարել է Մինսկում կայացած Եվրասիական միջկառավարական խորհրդի նիստին՝ մասնակցելով տեսակապով, փոխանցում է PAN.am-ը։
Վարչապետը նշել է, որ Հայաստանը հետևողականորեն առաջ է մղում խաղաղության, առևտրի և տրանսպորտային կապերի օրակարգը տարածաշրջանում։ Նրա խոսքով՝ «Խաղաղության խաչմերուկ» նախաձեռնությունը նպատակ ունի նոր հնարավորություններ ստեղծել տրանսպորտային, էներգետիկ և թվային կապերի զարգացման միջոցով։
Փաշինյանն ասել է, որ նախաձեռնության առանցքային բաղադրիչներից մեկը TRIPP-ն է՝ Trump Route for International Peace and Prosperity-ը։ Նրա խոսքով՝ նախագիծը կստեղծի ուղիղ երկաթուղային կապ Հայաստանի և Ադրբեջանի միջև, կօգնի ինտեգրել Հայաստանը միջազգային երկաթուղային ցանցին և հնարավորություն կտա ձևավորել երկաթուղային կապ Պարսից ծոցի և Սև ծովի միջև։
Վարչապետի գնահատմամբ՝ այդ զարգացումը կարևոր փոփոխություններ կբերի տրանսպորտային կապերի ոլորտում Հայաստանի, Ադրբեջանի, Վրաստանի և Իրանի համար։ Նա նաև հայտնել է, որ փակ ձևաչափով քննարկման ընթացքում գործընկերներին ներկայացրել է տարածաշրջանային տրանսպորտային ենթակառուցվածքների ապաշրջափակմանը վերաբերող մի շարք հարցեր, որոնք առնչվում են Հայաստանի և Ադրբեջանի միջև խաղաղության հաստատման գործընթացին։
Փաշինյանը կարևորել է ԵԱՏՄ օրենսդրությանը համապատասխան հայկական ապրանքների արտահանման և տարանցման առկա խոչընդոտների վերացման շուրջ երկխոսության շարունակությունը։ Նա ընդգծել է, որ ապրանքների, ծառայությունների, կապիտալի և աշխատուժի ազատ տեղաշարժը ԵԱՏՄ միասնական շուկայի լիարժեք աշխատանքի հիմքն է, իսկ պարենային անվտանգությունն ու գյուղատնտեսական մատակարարումների կանխատեսելիությունը՝ տնտեսական համագործակցության խորացման կարևոր պայման։
Աղբյուր՝ www.pan.am
