Վարչապետ Նիկոլ Փաշինյանը Ամուլսարի ոսկու հանքավայրի շահագործման մեկնարկի պաշտոնական արարողությանը հայտարարել է, որ նախագիծը պետք է ծառայեցվի Հայաստանի զարգացմանն ու բարեկեցությանը։ Նրա խոսքով՝ ընդերքը Հայաստանի ժողովրդի սեփականությունն է, և այդ ռեսուրսը պետք է օգնի երկրի տնտեսական առաջընթացին։
Փաշինյանը Ամուլսարի ծրագրի մեկնարկը բնութագրել է որպես «հաջողության պատմություն» և առանձնացրել այն հանգամանքը, որ արարողությունն անցել է առանց մոտակայքում բողոքի ակցիաների։ Նա նշել է, որ տասնյակ քննարկումների և խորհրդակցությունների արդյունքում բնապահպանական հարցերին պատասխաններ են տրվել, իսկ կառավարությունն այսօր համոզված է, որ նշված ռիսկերը տեղ չունեն։
Ամուլսարի՝ Ջերմուկին հարակից ոսկու հանքավայրը երկար տարիներ եղել է Հայաստանի ամենաաղմկոտ ներդրումային նախագծերից մեկը։ Բնապահպաններն ու հարակից համայնքների մի շարք բնակիչներ պնդել են, որ հանքի շահագործումը կարող է աղտոտման վտանգ ստեղծել առողջարանային գոտու ջրերի, օդի և հողի համար։ Տեղի բնակիչները 2018 թվականից փակ էին պահում հանքավայր տանող ճանապարհը՝ խոչընդոտելով շինարարության մեկնարկը։
Վարչապետը նաև անդրադարձել է տնտեսական ազդեցությանը՝ հիշեցնելով, որ կառավարությունն այս նախագծում ունի 12,5 տոկոս բաժնեմաս։ Նրա խոսքով՝ Հայաստանի տնտեսությունը վերջին հինգ տարիներին միջինում աճել է տարեկան 7.9 տոկոսով, իսկ 2018 թվականից մինչև 2025 թվականի արդյունքներով երկրի ՀՆԱ-ն աճել է 53 տոկոսով։ Լրացուցիչ բյուջետային եկամուտները, ըստ Փաշինյանի, կարող են ուղղվել ճանապարհների, դպրոցների, լուսավորության և անվտանգության ծրագրերին։
Ամուլսարի ծրագիրն իրականացվում է «Լիդիան Հայաստան» ընկերության և ՀՀ Կառավարության ռազմավարական համագործակցության շրջանակում։ Ընկերությունը նախագծում արդեն ներդրել է շուրջ 750 մլն ԱՄՆ դոլար, որից 150 մլն ԱՄՆ դոլարը՝ ՀՀ Կառավարության կողմից տրված պետական երաշխիքի հիման վրա։ Նախատեսվում է, որ հանքավայրը տարեկան կարտադրի շուրջ 210,000 ունցիա ոսկի։
Աղբյուր՝ www.azatutyun.am
