Մերձավոր Արևելքին անհրաժեշտ են հեղուկացված բնական գազի՝ LNG-ի արտահանման այլընտրանքային ուղիներ, որոնք կշրջանցեն Հորմուզի նեղուցը, Gastech համաժողովում հայտարարել է Օմանի էներգետիկայի և հանքային ռեսուրսների նախարար Սալիմ Ալ-Աուֆին։ Նրա խոսքով՝ տարածաշրջանը պետք է մտածի արտահանման տարբեր տարբերակների մասին՝ ռեսուրսները տարածքից դուրս բերելու համար։
Bloomberg-ի փոխանցմամբ՝ Ալ-Աուֆին ասել է. «Եկեք բացահայտենք արտահանման այլընտրանքային տարբերակներ։ Լինի դա դեպի հյուսիս, թե Օմանի կամ Եմենի միջոցով։ Դիվերսիֆիկացրեք ձեր տարբերակները, որպեսզի ռեսուրսները դուրս գան տարածքից»։
Թեման հատկապես սրվել է այն բանից հետո, երբ Միացյալ Նահանգների և Իսրայելի ու Իրանի միջև պատերազմի մեկնարկից հետո Պարսից ծոցից LNG արտահանումը կտրուկ նվազել է։ Նոր երթուղիները, սակայն, կպահանջեն նոր խողովակաշարերի կառուցում, ինչը ժամանակատար է և կարող է դրանք արագ վերածել նոր թիրախների՝ հաշվի առնելով Եմենից Սաուդյան Արաբիայի East-West խողովակաշարի վրա վերջին հարվածները։
Օմանը տարեկան արտադրում է ավելի քան 11 միլիոն տոննա հեղուկացված բնական գազ։ 2026 թվականին Oman LNG հաբը աշխատել է անվանական հզորությունից բարձր՝ փորձելով փոխհատուցել հարևան Կատարից կորցրած մատակարարումները, որը նախկինում տարածաշրջանի խոշորագույն արտադրողն էր։ MEES-ի հուլիսի կեսերի զեկույցի համաձայն՝ ծոցի այս պետության երեք գծերն արտադրել են 11.4 միլիոն տոննա տարեկան անվանական հզորությունից ավելի արագությամբ։
Միաժամանակ Chevron-ի ավստրալական գործառնությունների նախագահ Բալաջի Կրիշնամուրտին Bloomberg-ին ասել է, որ LNG գները, ամենայն հավանականությամբ, ավելի երկար կմնան բարձր մակարդակի վրա։ Նրա գնահատմամբ՝ գների նկատելի նվազում տեսնելը դժվար է, և շուկան կարող է բարձր գների պայմաններում մնալ առնվազն ևս վեց ամիս։
Ավելի վաղ Reuters-ը, հղում անելով անանուն աղբյուրների, գրել էր, որ QatarEnergy-ը փորձում է LNG գործարքներ կնքել ամերիկյան արտադրողների հետ՝ Իրանի հարվածներից վնասված ներքին մատակարարումները փոխհատուցելու համար։ Խոսքը մինչև 2031 թվականը երկարաժամկետ պայմանագրերի մասին է, ինչը կարող է նշանակել, որ Ras Laffan-ի վերագործարկումը զգալի ժամանակ կպահանջի և կարող է ավելի երկարաձգել LNG բարձր գների շրջանը։
Աղբյուր՝ oilprice.com
