Կրիպտոարժույթների մայնինգով զբաղվող ընկերությունները սկսել են մասշտաբային դուրսգրումներ կատարել հին սարքավորումների հաշվին, որպեսզի իրենց ենթակառուցվածքները հարմարեցնեն արհեստական բանականության (ԱԲ) աշխատանքին։ Այդ մասին, հղում անելով TheEnergyMag-ին, գրում է աղբյուրը։
Պարբերականի գնահատմամբ՝ 2026 թվականի առաջին կիսամյակում խոշոր ամերիկյան մայնինգային ընկերությունների կորուստները այլևս ոչ պիտանի սարքավորումների պատճառով կհասնեն 1.5 մլրդ դոլարի։ Խոսքը վերաբերում է այն ակտիվներին, որոնք այլևս արդյունավետ չեն բիթքոյնի արդյունահանման համար կամ վերապրոֆիլավորվում են այլ նպատակների համար։
ԱՄՆ-ում հրապարակային մայնինգային ընկերություններն ընդհանուր առմամբ 75 EH/s-ով կրճատել են բիթքոյնի արդյունահանման իրենց հզորությունները՝ հեշրեյթը։ TheEnergyMag-ի հաշվարկով՝ եթե սարքավորումների արժեքը կազմի TH/s-ի դիմաց 20 դոլար, ապա այդ ծավալին համապատասխանող տեխնիկայի արժեքը կլինի մոտ 1.5 մլրդ դոլար։
Միաժամանակ հրապարակման մեջ նշվում է, որ այս գնահատականը ներառում է միայն հենց սարքավորումների արժեքը։ Դրա մեջ չեն մտնում շենքերը, էլեկտրական սարքավորումները, հովացման համակարգերը և մոնտաժային աշխատանքները, որոնք անհրաժեշտ են նման հզորությունների շահագործման համար։
Այսպիսով, ոլորտում խորանում է միտումը, երբ մայնինգային ընկերությունները կապիտալն ու ենթակառուցվածքները տեղափոխում են դեպի արհեստական բանականության հետ կապված հաշվարկային պահանջարկը սպասարկող նախագծեր։
Աղբյուր՝ b24.am
