Idram-ը և IDBank-ը հայտարարել են, որ Հայաստանում շարունակում են երեխաների և դեռահասների ֆինանսական գրագիտության զարգացման ծրագրերը՝ համադրելով ուսուցումը և առօրյա կիրառման գործիքները։ Ընկերությունների գնահատմամբ՝ միայն տեսական գիտելիքը բավարար չէ․ կարևոր է նաև, որ երեխաները կարողանան համեմատել տարբերակները, հասկանալ ռիսկերը և պատասխանատու որոշումներ ընդունել իրական իրավիճակներում։
Հրապարակման մեջ հիշատակվում են OECD երկրների PISA 2022 հետազոտության տվյալները, ըստ որոնց՝ միջինում 15-ամյա աշակերտների միայն 11%-ն է ցուցաբերում ֆինանսական գրագիտության ամենաբարձր՝ 5-րդ մակարդակին համապատասխան կարողություններ։ Նույն հետազոտությամբ՝ 63% դեռահասներ ունեն բանկային հաշիվ, իսկ 86%-ը վերջին մեկ տարվա ընթացքում առցանց գնում է կատարել, ինչը թվային ֆինանսական միջավայրում անվտանգ վարքագծի կարևորությունը դարձնում է ավելի ակնառու։
Նշվում է նաև, որ ֆինանսական գիտելիքներն ու վարքագիծը փոխկապակցված են։ Ավելի բարձր ֆինանսական գրագիտություն ունեցող դեռահասները 72% ավելի հաճախ են խնայում և 50% ավելի հաճախ են գները համեմատում գնումից առաջ։ Միևնույն ժամանակ, 64% դեռահասներ կանոնավոր քննարկում են իրենց ծախսերը ծնողների հետ, և այդպիսի քննարկումներ ունեցող երեխաները, ըստ նյութի, ավելի բարձր արդյունքներ են գրանցում ֆինանսական գրագիտության թեստերում։
Հայաստանի վերաբերյալ ընկերությունները վկայակոչում են PISA 2025-ի տվյալները, ըստ որոնց՝ 15-ամյա աշակերտների միայն 28%-ն է հասել մաթեմատիկական գրագիտության առնվազն 2-րդ մակարդակին, իսկ ամենաբարձր մակարդակներին՝ 1%-ը։ Ընկերությունների գնահատմամբ՝ սա ցույց է տալիս, որ անհրաժեշտ է զարգացնել ոչ միայն գիտելիքը, այլև գործնական մտածողությունը և հիմնավորված ընտրություն կատարելու կարողությունը։
Այս մոտեցմամբ Idram-ն ու IDBank-ը ֆինանսական գրագիտության դասընթացներ են անցկացնում ինտերակտիվ քննարկումների և իրական օրինակների ձևաչափով՝ բովանդակությունը հարմարեցնելով տարբեր տարիքային խմբերին։ Դրան զուգահեռ Idram Junior հավելվածը, որը նախատեսված է 8-16 տարեկան երեխաների և դեռահասների համար, հնարավորություն է տալիս QR անհպում վճարումներ կատարել, լիցքավորել բջջային կապը, կառավարել անձնական միջոցները և դա անել ծնողի վերահսկողությամբ։ Ծնողը փոխանցում է գումարը, տեսնում ծախսերի պատմությունը և կարող է երեխայի հետ տանը վարել ֆինանսական թեմաներով քննարկումներ։
Ընկերություններն ընդգծում են, որ ապագայի ֆինանսապես գրագետ հասարակությունը ձևավորվում է ոչ միայն դասագրքային սահմանումներով, այլև ամենօրյա փորձով։ Նրանց գնահատմամբ՝ դասընթացներն ու Idram Junior-ը միասին միավորում են գիտելիքն ու պրակտիկան։ IDBank և Idram ընկերությունները վերահսկվում են ՀՀ ԿԲ-ի կողմից։
Աղբյուր՝ en.b24.am
