IDBank-ը զգուշացրել է «Fake Boss» կամ «CEO fraud» սխեմայի մասին, երբ խարդախները ներկայանում են որպես ընկերության ղեկավար կամ անմիջական ղեկավար և պահանջում են անհապաղ փոխանցել գումար, փոխել վճարային տվյալները կամ ուղարկել գաղտնի փաստաթղթեր։ Բանկի գնահատմամբ՝ նման հարձակումների թիրախում հաճախ հայտնվում են այն աշխատակիցները, որոնք ունեն մուտք ընկերության միջոցներին կամ կարևոր տեղեկատվությանը։
Սխեման սովորաբար կառուցվում է ղեկավարի հեղինակության և աշխատակցի հոգեբանական ճնշման վրա։ Խարդախները կարող են ստեղծել մեսենջերի կեղծ հաշիվ՝ իրական անունով և լուսանկարով, կեղծել էլեկտրոնային հասցե կամ նույնիսկ ապօրինի մուտք ստանալ իրական հաշվին։ Ավելի բարդ դեպքերում կիրառվում են նաև ձայնային կամ տեսաձայնային deepfake-եր։
IDBank-ը նշում է, որ նման հաղորդագրություններում գրեթե միշտ շեշտվում են երեք ազդակ՝ «շտապ է», «գաղտնի է» և «անձնական հանձնարարություն է»։ Հենց այս համադրությունն էլ, բանկի խոսքով, պետք է դառնա առավելագույն զգոնության պատճառ, նույնիսկ եթե նամակը կամ հաղորդագրությունը գալիս է ծանոթ հասցեից կամ ղեկավարի լուսանկարով պրոֆիլից։
Բանկը նաև հիշեցնում է իրավական ռիսկի մասին։ Եթե աշխատակիցը սեփական նախաձեռնությամբ կամ պաշտոնական բանկային ալիքներով ներկայացնում է վճարման հանձնարարական, բանկային ավտոմատ համակարգերը գործարքը կարող են դիտարկել որպես լիովին օրինական և պատշաճ հաստատված։ Այդ դեպքում խարդախությունը ապացուցելն ու գումարը հետ վերադարձնելը կարող է գրեթե անհնար լինել։
IDBank-ը խորհուրդ է տալիս միշտ կրկնակի ստուգել ոչ սովորական հանձնարարությունները, կապ հաստատել ղեկավարի հետ արդեն ստուգված հեռախոսահամարով կամ անձամբ, ինչպես նաև չհաստատել նման հարցումները միայն նույն նամակագրության կամ չատի շրջանակում։ Բացի այդ, բանկը կարևոր է համարում խոշոր և ոչ ստանդարտ փոխանցումների համար երկակի հաստատման մեխանիզմի ներդրումը, որպեսզի վճարումը հաստատեն առնվազն երկու պատասխանատու աշխատակիցներ։
Աղբյուր՝ en.b24.am
