Arminfo-ն գրում է, որ Հայաստանի իշխանությունները գազի գնի հնարավոր թանկացման շուրջ քննարկումներում սկսել են կապել թեման Հայաստանում տեղակայված 102-րդ ռուսական ռազմաբազայի հետ։ Հրապարակման մեջ այս մոտեցումը ներկայացվում է որպես Երևանի և Մոսկվայի խորացող տարաձայնությունների ֆոնին կիրառվող քաղաքական ազդակ։
Նյութում նշվում է, որ դեռ այս տարվա մայիսին ռուսական կողմը չի բացառել Հայաստանի համար գազի սակագնի բարձրացումը, եթե հանրապետությունը շարունակի Եվրամիությանն անդամակցելու կուրսը։ Arminfo-ի բնորոշմամբ՝ սկզբնական շրջանում հայկական իշխանությունները հրապարակային մեկնաբանություններից խուսափել են, իսկ հետո Նիկոլ Փաշինյանի և նրա թիմակիցների հայտարարություններում սկսել է հնչել հակադարձ քայլերի թեման։
Մասնավորապես, սեպտեմբերի 11-ին Ազգային ժողովի պաշտպանության և անվտանգության հարցերի մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Վիլեն Գաբրիելյանը Factor TV-ին տված հարցազրույցում, անդրադառնալով վարչապետի այն ակնարկին, թե գազի թանկացման դեպքում Հայաստանը նույնպես կարող է «թանկացնել» որոշ հարցեր, ասել է, որ դա կարող է վերաբերել նաև ռազմաբազայի համար վարձավճարի բարձրացմանը։ «Ինչո՞ւ ոչ։ Այո։ Դա նաև իմ անձնական տեսակետն է»,- նրա խոսքը փոխանցում է գործակալությունը։
Միաժամանակ հրապարակման մեջ շեշտվում է, որ 102-րդ ռուսական ռազմաբազան Հայաստանում տեղակայված է 1995 թվականի միջպետական պայմանագրի հիման վրա։ 2010 թվականին այդ փաստաթղթում կատարված փոփոխություններով ռազմաբազայի տեղակայման ժամկետը սկզբնական 25 տարուց երկարաձգվել է մինչև 49 տարի՝ մինչև 2044 թվականը։
Arminfo-ն նաև պնդում է, որ ռուսական կողմը ռազմաբազայի համար վարձավճար չի վճարում, և այս համատեքստում քննադատում է ռազմաբազայի վարձավճարի թեման շրջանառող հայտարարությունները։
Աղբյուր՝ arminfo.info
