Հայաստանում բյուջետային միջոցների վերաբաշխման միջոցով 1.98 մլրդ դրամ կհատկացվի մարզերում գտնվող 14 դպրոց տանող ճանապարհների բարեկարգման և հիմնանորոգման համար։ Այդ մասին կառավարության նիստում հայտարարել է ՀՀ տարածքային կառավարման և ենթակառուցվածքների նախարար Դավիթ Խուդաթյանը։
Նրա խոսքով՝ աշխատանքները կիրականացվեն Արագածոտնի, Արմավիրի, Լոռու, Սյունիքի, Վայոց ձորի և Տավուշի մարզերում։
Նախարարը նշել է, որ ծրագրով ընդգրկված ճանապարհների ընդհանուր երկարությունը 9.8 կմ է։ Շինարարական աշխատանքներն արդեն մեկնարկել են և գտնվում են տարբեր փուլերում։
Դավիթ Խուդաթյանի խոսքով՝ նախատեսվում է աշխատանքներն ավարտել ընթացիկ տարվա հոկտեմբեր-նոյեմբերին, իսկ դրանց զգալի մասը կկատարվի արդեն սեպտեմբերին։
Տեղեկանքի համար՝ $1-ի փոխարժեքը կազմել է 363.89 դրամ։
Աղբյուր՝ arka.am
