Հայաստանում 2026 թվականի առաջին կիսամյակում ադամանդների արտահանումն ու ներմուծումը շարունակել են նվազել երկնիշ տեմպերով։ Այս մասին վկայում են ՀՀ մաքսային ծառայության տվյալները։
Ըստ հրապարակված ցուցանիշների՝ ադամանդների արտահանումը կազմել է 73.7 հազար կարատ, ինչը 62.2%-ով պակաս է նախորդ տարվա նույն ժամանակահատվածի համեմատ։ Միաժամանակ արտահանման մաքսային արժեքը նվազել է 14.1%-ով՝ մինչև $51.3 մլն։
Արտահանման հիմնական ուղղությունները եղել են ՌԴ-ն՝ 59.8% մասնաբաժնով, և ԱՄԷ-ն՝ 27.3%։ Ավելի փոքր ծավալներ բաժին են ընկել Բելգիային՝ 5.8%, և Իսրայելին՝ 4%։ Շատ ավելի սահմանափակ խմբաքանակներ մատակարարվել են ԱՄՆ, Թաիլանդ, Վրաստան, Կանադա, Գերմանիա, Բելառուս և Նորվեգիա։
Ներմուծման մասով Հայաստանը հաշվետու ժամանակահատվածում ներմուծել է 115.2 հազար կարատ ադամանդ, ինչը տարեկան կտրվածքով 52%-ով պակաս է։ Ներմուծված ադամանդների մաքսային արժեքը ևս կրճատվել է՝ 23.7%-ով, մինչև $49.4 մլն։
Ադամանդների ներմուծման գլխավոր աղբյուրները եղել են Հնդկաստանը՝ 46.4% մասնաբաժնով, և ԱՄԷ-ն՝ 27.4%։ Դրանց հաջորդել են Կանադան՝ 4.8%, և Հոնկոնգը՝ 4%։ Փոքր ծավալներ ներմուծվել են նաև Բելգիայից, Նամիբիայից, Անգոլայից, Բոտսվանից, Իսրայելից, Հարավաֆրիկյան Հանրապետությունից, Բրազիլիայից, Չինաստանից, Ճապոնիայից, Լիբանանից, ՌԴ-ից և Տանզանիայից։
Միևնույն ժամանակ վիճակագրական տվյալներով՝ 2026 թվականի առաջին կիսամյակում Հայաստանի ոսկերչական արդյունաբերության արտադրանքի ծավալն աճել է 17%-ով և հասել 14.5 մլրդ դրամի, կամ $39.5 մլն-ի։
Երկամյա կտրվածքով թանկարժեք մետաղների և քարերի մասնաբաժինը Հայաստանի արտահանման կառուցվածքում նվազել է 71%-ից մինչև 17%, իսկ ներմուծման կառուցվածքում՝ 55%-ից մինչև 6%։ 2026 թվականի առաջին կիսամյակի արդյունքներով այդ ծավալները կազմել են համապատասխանաբար $589 մլն և $394 մլն։
Աղբյուր՝ finport.am
