Հայաստանի և Իրանի մաքսային ծառայությունների ղեկավարները համաձայնության են եկել Նորդուզ–Մեղրի ուղղությամբ պարզեցված «կանաչ» մաքսային միջանցք գործարկելու շուրջ։ Այդ մասին հայտնել է իրանական Tasnim գործակալությունը՝ անդրադառնալով Հայաստանի Պետական եկամուտների կոմիտեի նախագահ Էդուարդ Հակոբյանի և Իրանի մաքսային վարչակազմի ղեկավար Ֆորուդ Ասգարիի հանդիպման արդյունքներին։
Հանդիպումը տեղի է ունեցել Ջուլֆայում։ Քննարկման առանցքում եղել են երկու երկրների միջև մաքսային ընթացակարգերի պարզեցումը և բեռնատարների տեղաշարժի արագացումը։ Արդյունքում ստորագրվել է համապատասխան արձանագրություն։
Tasnim-ի փոխանցմամբ՝ կողմերը պայմանավորվել են զարգացնել բեռնատարների վերաբերյալ տեղեկատվության նախնական էլեկտրոնային փոխանակման համակարգը (Pre-Arrival)։ Նախատեսվում է փուլային անցում թղթային փաստաթղթաշրջանառությունից թվային ձևաչափի։
Օրակարգում եղել են նաև լիազորված տնտեսական օպերատորների կարգավիճակի փոխադարձ ճանաչման (AEO/MRA), մաքսային տվյալների էլեկտրոնային փոխանակման (EDI) և երկու երկրների մաքսային մարմինների աշխատանքի համակարգման հարցերը։
Բացի այդ, Հայաստանը և Իրանը պայմանավորվել են ևս 10 տարով երկարաձգել Նորդուզ–Մեղրի սահմանային դարպասների համատեղ օգտագործման վերաբերյալ համաձայնագիրը։ Երկու երկրների մաքսային կառույցների ղեկավարները նաև շրջայց են կատարել սահմանային ենթակառուցվածքներում և ծանոթացել մաքսային ընթացակարգերի կազմակերպմանը։
Ավելի վաղ Tasnim-ը հայտնել էր, որ Իրանը և Հայաստանը վերջնականացնում են «կանաչ» մաքսային միջանցքի մեխանիզմի համաձայնեցումը, որը պետք է արագացնի ապրանքների անցումը սահմանով։ Այդ մեխանիզմը ենթադրում է թղթային փաստաթղթերի ծավալի և մաքսային ստուգումների թվի կրճատում՝ ռիսկերի կառավարման համակարգի հիման վրա, ինչպես նաև տվյալների նախնական էլեկտրոնային փոխանակում։
Նախնական փուլում պարզեցված ռեժիմը, մասնավորապես, կկիրառվի գյուղատնտեսական արտադրանքի, սննդամթերքի և առանձին առաջին անհրաժեշտության ապրանքների նկատմամբ։
Աղբյուր՝ arka.am
