Հայաստանի և Ադրբեջանի համապատասխան գերատեսչությունների ներկայացուցիչները հոկտեմբերի 8-ին Գորիսում անցկացրել են տեխնիկական հանդիպում՝ TRIPP նախագծի շրջանակում էլեկտրահաղորդման գծերի տեղակայումը քննարկելու համար։ Այդ մասին հայտնել է Հայաստանի տարածքային կառավարման և ենթակառուցվածքների նախարարությունը։
Հանդիպման ընթացքում կողմերը քննարկել են էլեկտրահաղորդման գծերի տեղակայմանը վերաբերող տեխնիկական հարցերը և փոխանակել կարծիքներ առաջարկվող երթուղու առանձին բաղադրիչների շուրջ։
Նախարարության հաղորդագրության համաձայն՝ առանձնակի ուշադրություն է դարձվել պատասխանատու կառույցների միջև համակարգմանը, ինչպես նաև այն հաջորդ քայլերին, որոնք անհրաժեշտ են աշխատանքների առաջխաղացման համար։
Ավելի վաղ տարածքային կառավարման և ենթակառուցվածքների նախարար Դավիթ Խուդաթյանը հայտարարել էր, որ Հայաստանը և Թուրքիան քննարկել են իրենց էներգահամակարգերի միացումը, իսկ նույն թեմայով քննարկումներ սկսվել են նաև Ադրբեջանի հետ։
Աղբյուր՝ www.pan.am
