Հայաստանը հետևում է ազատ շուկայի, բաց սահմանների և գործընկեր երկրների հետ բաց գործարքների քաղաքականությանը։ Այդ մասին Երևանում կայացած 4Future Banking ֆորումում հայտարարել է ՀՀ Կենտրոնական բանկի փոխնախագահ Օհաննես Խաչատրյանը։
Նրա խոսքով՝ Հայաստանի մոտեցումն ուղղված է բացությանը և տնտեսական բարեկեցությանը։ Խաչատրյանը նշել է, որ ԿԲ-ում դրական են գնահատում ինչպես արտերկրում հայկական ընկերությունների հաջողությունները, այնպես էլ Հայաստանի շուկա մուտք գործող այն ընկերությունների գործունեությունը, որոնք տեղական ֆինանսական կազմակերպությունների գործընկերներն են։
ԿԲ փոխնախագահը նաև ընդգծել է, որ Հայաստանի ֆինանսական հատվածը ավելի քան երեք տասնամյակում ապացուցել է իր կայունությունը։ Նրա գնահատմամբ՝ այն այսօր ոչ միայն տնտեսությունը սպասարկող հատված է, այլև ինքնուրույն դերակատարություն ունեցող ոլորտ։
Խաչատրյանը ֆինանսական համակարգը բնութագրել է նաև որպես արտահանման կողմնորոշում ունեցող ոլորտ՝ այն դասելով երկրի տնտեսության կարևոր գործոնների շարքը։
Տեխնոլոգիաներ և նորարարություն
Անդրադառնալով ֆինանսական տեխնոլոգիաների զարգացմանը՝ նա նշել է, որ տեխնոլոգիական հնարավորությունները լայնանում են, իսկ նոր լուծումները շուկա են գալիս շատ արագ։ Միևնույն ժամանակ, նրա խոսքով, տեխնոլոգիաները չպետք է դառնան ինքնանպատակ։
Խաչատրյանի խոսքով՝ դրանց կիրառման վերջնական նպատակը պետք է լինի ֆինանսական ծառայությունների արդյունավետության և անվտանգության բարձրացումը, գործարքների արագության ավելացումը և սպառողների համար ընդունելի գնագոյացման ապահովումը։
Նա կարևորել է նաև վստահությունը նոր տեխնոլոգիաների ներդրման գործընթացում՝ թե՛ ֆինանսական ծառայություններ մատուցողների, թե՛ այն ենթակառուցվածքի նկատմամբ, որի վրա դրանք հիմնված են։
ԿԲ փոխնախագահի խոսքով՝ ֆինանսական ենթակառուցվածքն արդեն չի սահմանափակվում միայն ոլորտի ներսում փոխգործակցությամբ, և մեծ նշանակություն ունի դրա միջոցով պետական ու մասնավոր ծառայությունների միացումը։ Այդպիսի էկոհամակարգում փոխադարձ վստահության բարձր մակարդակը, նրա գնահատմամբ, տեխնոլոգիաների ընդունման կարևոր նախապայման է։
Աղբյուր՝ arka.am
