Հայաստանը հետաքրքրված է ԵԱՏՄ մասնակցությամբ և ուզում է զարգացնել հարաբերությունները Ռուսաստանի հետ, Միխայիլ Միշուստինի հետ հանդիպմանն այսօր հայտարարեց Նիկոլ Փաշինյանը:
Հունիսի 7-ի խորհրդարանական ընտրություններից հետո, սա Հայաստանի վարչապետի առաջին աշխատանքային այցն է Ռուսաստան, Եկատերինբուրգ քաղաքում Փաշինյանը մասնակցում էր «Иннопром» միջազգային ցուցահանդեսին, որի շրջանակում էլ հանդիպեցին երկու երկրների կառավարությունների ղեկավարները:
«Ինչպես մինչև ընտրությունները, այնպես էլ ընտրություններից հետո մենք մտադիր ենք զարգացնել մեր հարաբերությունները Ռուսաստանի Դաշնության հետ», - հայտարարեց Նիկոլ Փաշինյանը:
Փաշինյանի այցը Եկատերինբուրգ հաջորդեց վերջին ամիսներին Ռուսաստանի կողմից հայկական ապրանքների արգելափակման որոշումներին, ինչի հետևանքով բազմաթիվ հայաստանյան ընկերություններ զրկվեցին իրենց արտադրանքը Ռուսաստան ու նաև այդ երկրի տարածքով այլ երկրներ արտահանելու հնարավորությունից:
Գյուղմթերքի, ձկնամթերքի, խմիչքների ու ծաղկի արտադրությամբ զբաղվող բազմաթիվ հայկական ընկերություններ, որոնք իրենց արտադրանքը արտահանում էին Ռուսաստան, վերջին շրջանում մեծ կորուստներ են կրում:
Պետք է գործեն ԵԱՏՄ համաձայնագրով նախատեսված դրույթները. Փաշինյան
Փաշինյանն այսօր Ռուսաստանի վարչապետի հետ հանդիպման հրապարակային մասում հատուկ շեշտեց՝ ԵԱՏՄ համաձայնագրով նախատեսված դրույթները պետք է գործեն:
«Շահագրգռված ենք, որ այն մեխանիզմները, որոնք նախատեսվում են ԵԱՏՄ համաձայնագրով, դրանք աշխատեն պլանավորված ռեժիմի համաձայն: Կարծում եմ, որ դա ԵԱՏՄ հետագա զարգացման շահերից է բխում», - նշեց Հայաստանի վարչապետը:
Միշուստինը իր հրապարակային ելույթում չանդրադարձավ նաև հայկական ապրանքների սահմանափակումներին, փոխարենը հույս հայտնեց, որ Հայաստանի կառավարությունը կշարունակի հարմարավետ պայմաններ ստեղծել ռուսական ներդրողների համար:
«Սա ձեր առաջինն արտասահմանյան այցն է հունիսի 7 -ին տեղի ունեցած խորհրդարանական ընտրություններից հետո: Հույս ունենք, որ ընտրությունների արդյունքում Հայաստանի նոր ձևավորվելիք կառավարությունը կապահովի հայ-ռուսական հարաբերությունների առաջընթաց զարգացումը՝ բարեկամության, բարեդրացիության ոգով՝ փոխադարձ հարգանքի և միմյանց շահերի հարգմամբ»:
Աղբյուր՝ www.azatutyun.am
