Հայաստանի համախառն միջազգային պահուստները օգոստոսին հասել են ռեկորդային $6,5 մլրդ-ի, ինչը համարժեք է ներմուծման 4,3 ամսվա ծածկույթի։ Այս գնահատականը ներկայացվել է Համաշխարհային բանկի Armenia Monthly Economic Update – September 2026 զեկույցում։
Զեկույցի հեղինակների գնահատմամբ՝ պահուստների աճի հիմնական գործոններից մեկը եղել են դրամական փոխանցումների և կապիտալի զգալի ներհոսքերը։ Մասնավորապես, հուլիսին զուտ ոչ առևտրային դրամական փոխանցումները տարեկան կտրվածքով աճել են 40%-ով՝ ցածր բազայի պայմաններում։
Համաշխարհային բանկը նշում է, որ այս աճը հիմնականում պայմանավորված է Ռուսաստանից միջոցների շարունակվող ներհոսքով, որը տարեկան աճել է 37,3%-ով, ինչպես նաև ռուսաստանցիների շարունակվող ներհոսքով դեպի Հայաստան։
Վերլուծաբանների տվյալներով՝ այդ մուտքերը նպաստել են նաև հայկական դրամի ամրապնդմանը։ Օգոստոսին դրամը նախորդ ամսվա համեմատ ամրապնդվել է 0,4%-ով ԱՄՆ դոլարի նկատմամբ և 1,1%-ով՝ եվրոյի նկատմամբ։ Միաժամանակ, 2025 թվականի օգոստոսի համեմատ դրամը 4,6%-ով ավելի ամուր է եղել ԱՄՆ դոլարի նկատմամբ, սակայն ռուսական ռուբլու նկատմամբ թուլացել է 8,6%-ով տարեկան արտահայտությամբ։
Պաշտոնական տվյալներով՝ 2026 թվականի հունվար-հուլիսին Հայաստանի բանկային համակարգով արտերկրից ֆիզիկական անձանց օգտին ստացված սահմանահատող փոխանցումների զուտ ներհոսքը կազմել է $1,56 մլրդ՝ 2025 թվականի նույն ժամանակահատվածի $716,6 մլն-ի դիմաց։ Միայն հուլիսին այդ ցուցանիշը կազմել է $179,1 մլն՝ նախորդ տարվա հուլիսի $129 մլն-ի համեմատ։
Աղբյուր՝ armbanks.am
