Եվրոպական բաժնետոմսերի շուկաները բացասական դաշտում են

Եվրոպական ֆոնդային ինդեքսներն ուրբաթ օրվա սակարկություններն ավարտել են անկմամբ՝ հետևելով նավթային և տեխնոլոգիական ընկերությունների բաժնետոմսերի գների նվազմանը:

Տարածաշրջանի խոշորագույն ընկերությունների Stoxx Europe 600 համաթիվը շուկայի փակման պահին նվազել է 0,68%-ով՝ հասնելով 635,88 կետի: Բրիտանական FTSE 100-ը կորցրել է 0,21%, գերմանական DAX-ը՝ 1,29%, ֆրանսիական CAC 40-ը՝ 0,55%, իտալական FTSE MIB-ը՝ 1%, իսկ իսպանական IBEX 35-ը՝ 0,45%:

Նավթի գներն ուրբաթ օրը կտրուկ անկում են ապրել այն լուրերի ֆոնին, որ Հորմուզի նեղուցով վառելիքի մատակարարումները կարող են ավելանալ: Այս ֆոնին էժանացել են BP (-2,4%), Eni (-1,3%), TotalEnergies (-1,3%) և Shell (-0,9%) ընկերությունների բաժնետոմսերը:

Միևնույն ժամանակ, անկում են ապրել նաև կիսահաղորդիչների ոլորտի ընկերությունների բաժնետոմսերի գները: Ներդրողների շրջանում ավելանում են այն մտահոգությունները, որ արհեստական բանականության (ԱԲ) ոլորտի ընկերությունների բաժնետոմսերի արժեքը չափազանց ուռճացված է, իսկ չիպերի գների կտրուկ բարձրացումն ուժեղացնում է տնտեսությունում գնաճային ճնշումների աճի վախերը:

STMicroelectronics-ի թղթերի արժեքը նվազել է 4,6%-ով, Infineon Technologies-ինը՝ 4,5%-ով, ASM International-ինը՝ 4,3%-ով, BE Semiconductor-ինը՝ 2,2%-ով, իսկ ASML Holding-ինը՝ 1%-ով:

Հեռահաղորդակցության սարքավորումների արտադրողներ Ericsson և Nokia ընկերությունների բաժնետոմսերը համապատասխանաբար էժանացել են 1,7%-ով և 6,5%-ով:

Օնլայն ռիթեյլեր Zalando-ի բաժնետոմսերը գրանցել են 6,3% անկում այն տեղեկությունից հետո, որ գերմանական ֆինանսական կարգավորողը (BaFin) ստուգում է ընկերության 2025 թվականի ֆինանսական հաշվետվությունները՝ հաշվապահական հաշվառման սկզբունքների հնարավոր խախտումների կասկածանքով:

Volkswagen-ի կապիտալիզացիան (շուկայական արժեքը) նվազել է 3,9%-ով: Ավտոարտադրողը նախատեսում է առաջիկա մի քանի տարիների ընթացքում ամբողջ աշխարհում կրճատել մինչև 100 հազար աշխատատեղ և դադարեցնել արտադրությունը Գերմանիայում գտնվող իր չորս գործարաններում:

Աերոտիեզերական և պաշտպանական ոլորտների համար համալրող մասեր արտադրող ֆրանսիական Safran ընկերության շուկայական արժեքը նվազել է 3,2%-ով: Սա տեղի է ունեցել այն տեղեկությունների ֆոնին, որ ընկերությունը բանակցություններ է վարում ծովային ականների ոչնչացման համար նախատեսված անօդաչու սարքեր արտադրող Exail Technologies-ը 2,2 միլիարդ եվրոյով գնելու շուրջ:

Այս լուրերի ֆոնին Exail-ի բաժնետոմսերի գինը թռիչքաձև աճել է 25%-ով:

Unilever-ի արժեթղթերը թանկացել են 0,3%-ով: Financial Times թերթը հայտնել է, որ ընկերությունը դիտարկում է սննդային հավելումների ամերիկյան արտադրող Thorne-ը գնելու հնարավորությունը, որը գնահատվում է 4 միլիարդ դոլար:

Ուրբաթ օրվա սակարկություններում համաթվի ամենամեծ աճն արձանագրել են բրիտանական Wise ֆինտեխ ընկերության բաժնետոմսերը (+9,6%). Մարտի 31-ին ավարտված 2026 ֆինանսական տարվա ընկերության հաշվետվությունը սպասվածից ավելի լավն է եղել:

Աղբյուր՝ news.am