Evocabank-ը ներկայացրել է խնայողական հաշիվ, որը թույլ է տալիս հաճախորդներին եկամուտ ստանալ հաշվին պահվող գումարի դիմաց՝ առանց գումարի հասանելիությունը կորցնելու։ Բանկի տվյալներով՝ հաշվի վրա կարելի է ստանալ մինչև 5.09% տարեկան տոկոսային եկամտաբերություն։
Խնայողական հաշիվը հնարավոր է բացել ՀՀ դրամով, ԱՄՆ դոլարով կամ եվրոյով։ Evocabank-ը նշում է, որ հաշվի բացումն ու սպասարկումն անվճար են, իսկ բացման և համալրման նվազագույն գումար, ինչպես նաև խնայելու պարտադիր ժամկետ, նախատեսված չեն։
Բանկի ներկայացմամբ՝ տոկոսները հաշվարկվում են ամեն օր՝ հաշվի դրական մնացորդի նկատմամբ։ Եթե օրվա վերջում մնացորդը համապատասխանում է տվյալ արժույթի համար սահմանված նվազագույն շեմին, այդ օրվա համար հաշվարկվում է տոկոսագումար։ Կուտակված տոկոսագումարը հաշվին փոխանցվում է յուրաքանչյուր եռամսյակի ավարտից հետո՝ հաջորդ ամսվա 1-ին օրը։
Գումարի անհրաժեշտության դեպքում հաճախորդը կարող է այն փոխանցել Evocabank-ում գործող իր մեկ այլ հաշվին և օգտագործել։ Բանկը նաև նշում է, որ գործարքի նվազագույն չափ սահմանված չէ, իսկ հաշիվը հնարավոր է համալրել ցանկացած պահի՝ Evocabank-ում գործող այլ հաշվից։
Evocabank-ը հիշեցնում է, որ համաձայն «Ֆիզիկական անձանց բանկային ավանդների հատուցումը երաշխավորելու մասին» ՀՀ օրենքի՝ բանկում բացված խնայողական հաշվում պահվող միջոցները համարվում են բանկային ավանդ։ Օրենքով սահմանված դեպքերում երաշխավորված ավանդները հատուցում է Ավանդների հատուցումը երաշխավորող հիմնադրամը՝ գործող սահմանաչափերով։
Աղբյուր՝ www.evoca.am
