Եմենում վերջին մեկ ամսվա ռազմական բախումները նոր վտանգներ են ստեղծել համաշխարհային էներգետիկ շուկաների համար, քանի որ մարտերը ծավալվում են Կարմիր ծովի կարևոր նավուղիների հարևանությամբ։ Al-Jazeera-ի փոխանցմամբ՝ Եմենի կառավարությանն աջակցող Ազգային դիմադրության ուժերը հայտարարել են, որ այդ ընթացքում իրենց շարքերում զոհվել է ավելի քան 500 զինծառայող, իսկ շուրջ 1500-ը սպանվել են հութի զինյալների հետ մարտերում։
Նույն աղբյուրի համաձայն՝ Ազգային դիմադրության ուժերը պնդում են, թե հութիների կորուստները ավելի մեծ են՝ ավելի քան 1000 զոհ և հազարավոր վիրավորներ։ Միևնույն ժամանակ, Al-Jazeera-ն նշել է, որ այդ տվյալները անկախ աղբյուրներով հաստատել չի կարողացել։
Անցնող շաբաթվա ընթացքում հութիները նախ վերահսկողություն են հաստատել Եմենի առանցքային Մոխա նավահանգստի նկատմամբ Կարմիր ծովում, ապա իրենց վերահսկողության տակ են վերցրել Եմենի տարածքում գտնվող ամբողջ ափամերձ գիծը Կարմիր ծովում և գրավել Պերիմ կղզին՝ Բաբ էլ-Մանդեբ նեղուցի մուտքի մոտ։
Այս զարգացումները խորացնում են նավթի համաշխարհային մատակարարումների շուրջ մտահոգությունները։ Շուկաներն արդեն ճնշման տակ էին Իրանի դեմ ԱՄՆ-ի և Իսրայելի պատերազմի ընթացքում Հորմուզի նեղուցով նավագնացության խափանումների պատճառով, իսկ այժմ հավելյալ ռիսկեր են առաջացել նաև Կարմիր ծովի ուղղությամբ։
Ազգային դիմադրության ուժերի հաղորդմամբ՝ ինտենսիվ մարտերը շարունակվում են, և հութիները փորձում են առաջանալ Եմենի հարավում ու հյուսիսում։ Հութիները, որոնք պաշտոնապես հայտնի են որպես «Անսար Ալլահ», օգտվում են Իրանի աջակցությունից և համարվում են Իրանի գլխավորած «դիմադրության առանցքի» մաս։
Աղբյուր՝ www.azatutyun.am
