Եվրամիությունում կանխատեսում են, որ այս ձմռանը վառելիքի գները կշարունակեն աճել։ Այդ գնահատականը Euronews-ին հայտնել է ԵՄ էներգետիկայի և բնակարանաշինության հարցերով հանձնակատար Դեն Յորգենսենը։
Նրա խոսքով՝ հիմնական ռիսկը կապված է Հորմուզի նեղուցում ստեղծված ճգնաժամի հետ, որի արագ հանգուցալուծումը առայժմ տեսանելի չէ։ Յորգենսենը նշել է, որ հենց դա է մեծացնում առաջիկա ամիսներին գների հետագա բարձրացման հավանականությունը։
Եվրահանձնակատարը ասել է, որ թանկացումն արդեն ազդում է թե՛ սովորական քաղաքացիների, թե՛ եվրոպական ընկերությունների վրա։ Նրա գնահատմամբ՝ վառելիքի շուկայում մոտ ժամանակում բարելավում սպասել պետք չէ։
«Ցավոք, պետք է խոստովանեմ, որ այս ձմռանը իրավիճակն ավելի կվատանա, քանի որ մենք Հորմուզի նեղուցի ճգնաժամի արագ լուծում չենք տեսնում», - ասել է նա Euronews-ին։
Յորգենսենը նաև հավելել է, որ նույնիսկ նեղուցի վերաբացման դեպքում կայուն մատակարարումների վերականգնման համար ժամանակ կպահանջվի։ Դա նշանակում է, որ ճնշումը գների վրա կարող է պահպանվել նաև ճգնաժամի թուլացումից հետո։
Աղբյուր՝ lurer.com
