Converse Bank-ի Ֆինանսական հաստատությունների և միջազգային բանկային գործառնությունների վարչության տնօրեն Նելլի Քոչարյանը մասնակցել է BACEE-ի 30-ամյակին նվիրված պանելային քննարկմանը։ Քննարկումը կայացել է Վարշավայում անցկացված Bank Pekao FI Day & 52nd BACEE International Banking Conference-ի շրջանակում։
Նելլի Քոչարյանը ներկայացրել է Converse Bank-ի և BACEE-ի միջև ձևավորված համագործակցությունը, դրա գործնական հնարավորություններն ու հետագա զարգացման ներուժը։ Նրա խոսքով՝ միջազգային բանկային համագործակցությունը հիմնվում է վստահության, ֆինանսական հաստատությունների միջև ուղիղ կապերի և յուրաքանչյուր շուկայի առանձնահատկությունների խորքային ըմբռնման վրա։
Քոչարյանը նշել է, որ BACEE-ն ստեղծում է հարթակ, որտեղ տարբեր երկրների բանկերը կարող են բացահայտել ընդհանուր բիզնես շահեր և դրանք վերածել փոխշահավետ համագործակցության։ Նա առանձնացրել է նաև մասնագիտական գիտելիքի և փորձի փոխանակման կարևորությունը միջազգային կապերի ընդլայնման գործում։
Որպես օրինակ նա ներկայացրել է Germany Landesbank Baden-Württemberg (LBBW)-ի հետ համատեղ մեկնարկած Young Talent Exchange Programme-ը։ Ծրագիրը Converse Bank-ի աշխատակիցներին հնարավորություն է տալիս գործնական ուսուցում և փորձ ձեռք բերել Եվրոպայի առաջատար ֆինանսական հաստատություններից մեկում։
Նրա խոսքով՝ բանկի նպատակը միջազգային մասնագիտական հարթակներում ներկայությունը վերածելն է շոշափելի արդյունքների՝ նոր ֆինանսական հնարավորություններից մինչև հայկական ընկերությունների և միջազգային գործընկերների միջև գործարար կապերի ձևավորում և ընդլայնում։ Converse Bank-ը BACEE-ի անդամ է 2024 թվականից և եղել է համաժողովի գլխավոր հովանավորը։
Աղբյուր՝ en.b24.am
