Չինաստանը մինչև 2030 թվականը ցանկանում է ամրապնդել իր դիրքերը ավտոմոբիլաշինության համաշխարհային շուկայում և միանալ ոլորտի առաջատարներին։ Այդ նպատակը կապվում է նոր էներգիայի աղբյուրներով աշխատող խելացի տրանսպորտային միջոցների՝ NEV-ների, արտադրական ամբողջ շղթայում երկրի ներկայության ուժեղացման հետ։
Ծրագրի համաձայն՝ մինչև 2030 թվականը NEV-ների բաժինը նոր մարդատար ավտոմեքենաների ընդհանուր վաճառքում պետք է հասնի առնվազն 70%-ի։ Առևտրային տրանսպորտային միջոցների համար նշաձողը սահմանվել է 40% մակարդակում։
Փաստաթուղթը նաև ենթադրում է, որ մինչև տասնամյակի ավարտը լայնորեն կտարածվեն ինքնավար վարման գործառույթներով մեքենաները։ Բարձր աստիճանի ավտոմատացված վարումը նախատեսվում է կիրառել արագընթաց մայրուղիներում, քաղաքային արագընթաց ճանապարհներին և որոշ քաղաքային ճանապարհներին։
Նպատակներին հասնելու համար Չինաստանը պատրաստվում է շարունակել առանցքային տեխնոլոգիաների զարգացումը։ Մինչև 2030 թվականը մարդատար ավտոմեքենաների վառելիքի միջին ծախսը պետք է կազմի 3.3 լիտր 100 կմ-ի հաշվով, իսկ ամբողջությամբ էլեկտրական մարդատար ավտոմեքենաների էլեկտրաէներգիայի միջին սպառումը՝ մոտ 11.5 կՎտ⋅ժ 100 կմ-ի հաշվով։
Ծրագրում խոսվում է նաև ոլորտի կառուցվածքի հետագա օպտիմալացման, թվային և խելացի զարգացման համեմատաբար բարձր մակարդակի ապահովման մասին։ Միաժամանակ աշխատանքի ընդհանուր արտադրողականությունը պետք է 2025 թվականի համեմատ աճի 15%-ով։
Սպասվում է, որ չինական մի շարք ընկերություններ վաճառքի ծավալով կընդգրկվեն աշխարհի առաջատար տասնյակում, ինչպես նաև ավտոպահեստամասերի խոշորագույն համաշխարհային արտադրողների թոփ-100-ում։
Չինաստանի ավտոարտադրողների ասոցիացիայի (CAAM) տվյալներով՝ օգոստոսին NEV-ների բաժինը նոր ավտոմեքենաների վաճառքի ընդհանուր ծավալում կազմել է ռեկորդային 60.6%։ Այս տեսակի մեքենաների արտադրությունը գերազանցել է 1.65 մլն միավորը, իսկ վաճառքը հասել է 1.64 մլն միավորի։ Երկու ցուցանիշների աճը 2025 թվականի օգոստոսի համեմատ կազմել է գրեթե 20%։
Արդեն 2025 թվականին BYD-ը, SAIC Motor-ը և Geely Automobile Holdings-ը վաճառքի ծավալով մտել էին աշխարհի առաջատար ավտոարտադրողների տասնյակի մեջ, ինչը ևս ընդգծում է Չինաստանի հավակնությունները համաշխարհային ավտոշուկայում։
Աղբյուր՝ b24.am
