Բրիտանական շքեղ ավտոմեքենաների արտադրող Bentley Motors-ը ներկայացրել է իր առաջին ամբողջովին էլեկտրական ավտոմեքենան՝ Torcal-ը, որով ընկերությունը փորձում է գնահատել բարձր գնողունակությամբ հաճախորդների հետաքրքրությունը էլեկտրական շարժիչով մոդելների նկատմամբ և մրցակցել, այդ թվում, Ferrari-ի հետ։
Torcal-ը դարձել է Bentley-ի 107-ամյա պատմության առաջին ամբողջովին էլեկտրական մեքենան և բրենդի չորրորդ մոդելը՝ Continental GT, Flying Spur և Bentayga շարքերից հետո։ Մոդելը նախագծվել և ինժեներականորեն մշակվել է ընկերության Կրյուում գտնվող արտադրական հարթակում՝ Անգլիայի հյուսիս-արևմուտքում։
Նոր մեքենայի շնորհանդեսը տեղի է ունեցել չորեքշաբթի երեկոյան Լոնդոնում։ Bentley-ի տվյալներով՝ Torcal-ի ընթացքի պաշարը հասնում է մինչև 600 կիլոմետրի, իսկ 0-60 մղոն/ժ արագացման համար պահանջվում է երեք վայրկյանից պակաս ժամանակ։ Մոդելի մեկնարկային գինը կազմում է 173,000 ֆունտ ստեռլինգ, կամ մոտ 229,000 դոլար։
Ներկայացումը տեղի է ունեցել Ferrari-ի առաջին ամբողջովին էլեկտրական Luce մոդելի թողարկումից ընդամենը երեք ամիս անց։ Ferrari-ի հինգտեղանի այդ մեքենան, որի գինը սահմանվել էր 550,000 եվրո՝ մոտ 626,000 դոլար, շուկայում հակասական արձագանք էր ստացել, իսկ վերլուծաբանների մի մասը բացասական վերաբերմունքը կապել էր դիզայնի հետ։
Bentley Motors-ի նախագահ և գլխավոր գործադիր տնօրեն Frank-Steffen Walliser-ը CNBC-ի Squawk Box Europe հաղորդմանը ասել է, որ Torcal-ը Bentley-ի գնային շարքում մուտքային մակարդակի դիրքավորում ունի, և ընկերությունն արդեն ստացել է շատ դրական արձագանքներ բոլոր շուկաներից։
Walliser-ի խոսքով՝ ավտոարդյունաբերությունում զարգացման ցիկլերը երկար են, և մրցակիցների քայլերին արագ արձագանքել հնարավոր չէ, քանի որ մեքենաների մշակումն ու ինժեներական աշխատանքները տարիներ են տևում։ Նրա գնահատմամբ՝ էլեկտրական ավտոմեքենաների նկատմամբ ընդունելիությունը շարունակվում է, իսկ հաճախորդներն ավելի լավ են հասկանում, թե ինչ կարող է առաջարկել այդ տեխնոլոգիան։
Մինչ Porsche-ն և Lamborghini-ն թույլ պահանջարկի պատճառով կրճատում են իրենց էլեկտրական ծրագրերը, Bentley-ում նշում են, որ հատկապես ապահովված գնորդների շրջանում էլեկտրական մեքենաների նկատմամբ հետաքրքրությունը աճում է։ Ընկերության ղեկավարի խոսքով՝ Torcal-ը ստեղծելիս շեշտը դրվել է դիզայնի, վարքագծի և ձայնային միջավայրի վրա, որպեսզի այն մնա «իսկական Bentley»։
Աղբյուր՝ www.cnbc.com
