Անվտանգության խորհրդի նախկին քարտուղար Արմեն Գրիգորյանը նոր աշխատանք ունի։ Նա միացել է «Policy and Management Consulting Group» (PMCG) միջազգային խորհրդատվական ընկերությանը՝ որպես ավագ խորհրդական։
Ընկերության տարածած հաղորդագրության համաձայն՝ Գրիգորյանը PMCG է գալիս պետական կառավարման բարձր մակարդակներում ձեռք բերած փորձով։ Հայտարարության մեջ առանձնապես նշվում են նրա երկարամյա գործունեությունը ռազմավարական կառավարման, դիվանագիտության, միջազգային հարաբերությունների, ինստիտուցիոնալ բարեփոխումների, ճգնաժամերի կառավարման և տարածաշրջանային անվտանգության ոլորտներում։
PMCG-ն նաև ընդգծել է, որ Արմեն Գրիգորյանի աշխատանքի կարևոր ուղղություններից մեկը եղել է Հարավային Կովկասի վրա ազդող բարդ հարցերի շուրջ ներգրավվածությունը։ Խոսքը վերաբերում է երկխոսությանը, բանակցություններին, տարածաշրջանային անվտանգությանը, հակամարտությունների կարգավորմանը, ինչպես նաև խաղաղության և կայունության ամրապնդման ջանքերին։
Ընկերության հայտարարության մեջ նշվում է, որ այս փորձն արդեն կիրառվում է PMCG-ի աշխատանքում։ Մասնավորապես, Գրիգորյանը ներգրավված է TRIPP-ի իրագործելիության գնահատման գործընթացում։ Նախաձեռնությունը, ըստ հաղորդագրության, ուղղված է Հայաստանի տարածքով հաղորդակցությունների ամրապնդմանը և տարածաշրջանային համագործակցության, խաղաղության ու բարգավաճման ավելի լայն հնարավորությունների խթանմանը։
PMCG-ն հավելել է նաև, որ պետական ծառայությունից հետո Արմեն Գրիգորյանը շարունակել է զբաղվել հետազոտություններով, քաղաքականության վերլուծությամբ և ակադեմիական գործունեությամբ։
Աղբյուր՝ armtimes.com
