Միացյալ Նահանգները սահմանափակել է այն ժամային միջակայքերը, որոնց ընթացքում առևտրային նավերը կարող են Հորմուզի նեղուցով անցնել ամերիկյան պաշտպանության ներքո։ Financial Times-ի հաղորդմամբ՝ նավերից այժմ պահանջվում է անցնել միայն որոշակի ժամերի, երբ ամերիկացի զինծառայողները կարող են ապահովել դրանց օդային պաշտպանությունը։
Մայիսից Վաշինգտոնը օդային պաշտպանություն է ապահովում նեղուցի հարավային հատվածով՝ Օմանի ափի երկայնքով ընթացող նավերի համար։ Նախկինում նավատերերին տրամադրվում էին երթուղու կոորդինատներ, և նրանց թույլատրվում էր անցում կատարել գիշերային ավելի երկար ժամանակահատվածում, երբ նավերի վերևում կարող էին գործել ամերիկյան ռազմական օդանավերը։
Սակայն սեպտեմբերից այդ ռեժիմը փոխվել է։ Այժմ անցման հնարավորությունը սահմանափակվել է 24 ժամվա ընթացքում երկու կոնկրետ ժամային պատուհանով։ Վերլուծաբանների գնահատմամբ՝ այս քայլը ԱՄՆ-ին թույլ կտա ավելի արդյունավետ բաշխել իր ռեսուրսները։ Ժամանակակից ամերիկյան ռազմական օդանավի շահագործումը կարող է արժենալ 25 հազարից մինչև 75 հազար դոլար թռիչքի մեկ ժամում։
Financial Times-ի տվյալներով՝ փետրվարի 28-ին Իրանի շուրջ ռազմական հակամարտության սկսվելուց հետո Հորմուզի նեղուցում հարձակման է ենթարկվել յոթ տասնյակից ավելի առևտրային նավ։
Անցման կանոնների փոփոխությունը տեղի է ունենում այն պայմաններում, երբ ԱՄՆ-ն ու Իրանը փորձում են Հորմուզում առաջ մղել իրենց կանոնները։ Այս ամսվա սկզբին Իրանի Իսլամական հեղափոխության պահապանների կորպուսի ներկայացուցիչը հայտարարել էր, որ Թեհրանը նեղուցից արևելք ստեղծում է նավագնացության համար արգելված գոտի։
Սեպտեմբերի 9-ին իրանցի զինվորականները նաև հայտարարել էին, որ Հորմուզի նեղուցի շրջանում հարվածել են ամերիկյան ութ լցանավերի՝ դա ներկայացնելով որպես պատասխան իրանական նավերի վրա ԱՄՆ հարձակումներին։
Մինչև պատերազմը Հորմուզի նեղուցով տեղափոխվում էր աշխարհում սպառվող նավթի մոտ 20 տոկոսը, ինչի պատճառով այնտեղ անվտանգության ռեժիմի ցանկացած փոփոխություն անմիջապես անդրադառնում է համաշխարհային էներգետիկ շուկաների վրա։
Աղբյուր՝ www.azatutyun.am
