Պենտագոնը զգուշացնում է ԱՄՆ զինամթերքի պաշարների հնարավոր պակասի մասին

ԱՄՆ-ը կարող է բախվել սպառազինության պաշարների պակասի, ասվում է Պենտագոնի գլխավոր տեսուչի զեկույցում, որը վերաբերում է Իրանի դեմ պատերազմի հետևանքներին։ Փաստաթղթի գնահատմամբ՝ ռազմական գործողությունների ընթացքում զինամթերքի մեծածավալ օգտագործումը հանգեցրել է ռազմավարական պաշարների կրճատման։

Զեկույցում նշվում է նաև, որ իրավիճակը բացահայտել է նոր զինամթերքի արտադրության և մատակարարման սահմանափակ հնարավորությունները։ Այսինքն՝ սպառված պաշարների արագ վերականգնումը կարող է դժվար լինել, եթե ռազմական բեռը պահպանվի նույն մակարդակի վրա։

Պենտագոնի հաշվարկով՝ փետրվարի 28-ից հունիսի 30-ը Իրանի դեմ ԱՄՆ ռազմական գործողություններն արժեցել են մոտ 33,4 միլիարդ դոլար։ Այդ գումարից 22,3 միլիարդ դոլարը բաժին է ընկել օգտագործված զինամթերքի արժեքին։

Մինչ այժմ Պենտագոնը հերքել էր զինամթերքի պակասի մասին հրապարակումները՝ պնդելով, որ ամերիկյան բանակն ունի անհրաժեշտ սպառազինությունը։ Նախագահ Դոնալդ Թրամփը սեպտեմբերի 14-ին հայտարարել էր, որ Միացյալ Նահանգները հիմա ավելի շատ ժամանակակից զենք է արտադրում, քան երբևէ, և այդ սպառազինությունն ամեն օր մատակարարվում է Մերձավոր Արևելքում տեղակայված ամերիկյան ուժերին։

Զեկույցը արձանագրում է նաև պատերազմի նյութական հետևանքները տարածաշրջանում տեղակայված ամերիկյան օբյեկտների համար։ Ըստ փաստաթղթի՝ իրանական հարվածների հետևանքով հարյուրավոր շենքեր ու կառույցներ վնասվել կամ ավերվել են Քուվեյթում, Բահրեյնում, Կատարում, ԱՄԷ-ում, Սաուդյան Արաբիայում, Իրաքում, Օմանում և Հորդանանում գտնվող ամերիկյան ռազմաբազաներում։

Բացի այդ, վնասվել կամ ոչնչացվել են նաև տասնյակ ամերիկյան օդանավեր, նշվում է զեկույցում։

Աղբյուր՝ www.azatutyun.am