Չինաստանի առևտրի նախարարությունը կոշտ նախազգուշացում է հղել Եվրամիությանը՝ Պեկինում սպասվող բարձր մակարդակի բանակցություններից առաջ։ Գերատեսչությունը հայտարարել է, որ եթե ԵՄ-ն սահմանափակումներ մտցնի չինական ընկերությունների կամ ապրանքների նկատմամբ, Չինաստանը «վճռականորեն կարձագանքի»։
Նախարարության հայտարարության համաձայն՝ նման քայլերը, այն պայմաններում, երբ կողմերը արդեն ամառվանից առևտրային բանակցություններ են վարում, «լրջորեն կխաթարեն փոխադարձ վստահությունը» և կվնասեն ընթացիկ քննարկումներին։
Եվրոպան փորձում է մինչև հոկտեմբեր կրճատել Չինաստանի հետ ունեցած ռեկորդային առևտրային դեֆիցիտը։ ԵՄ առևտրի հանձնակատար Maroš Šefčovič-ը Euronews-ին տված հարցազրույցում այս շաբաթ ասել էր, որ Պեկինը մինչև հոկտեմբեր պետք է ապահովի «կոնկրետ արդյունքներ», հակառակ դեպքում կկիրառվեն «ավելի կոշտ միջոցներ»։ Սպասվում է, որ նա հաջորդ շաբաթ կայցելի Պեկին։
Այս շաբաթ Rhodium Group-ի Noah Barkin-ը հայտնել էր, որ Եվրոպայում քննարկվում են միջոցներ, որոնք կարող են փաստացի փակել Չինաստանի մուտքը եվրոպական շուկա։ Նրա խոսքով՝ Գերմանիան և Ֆրանսիան ավարտին են հասցնում համատեղ փաստաթուղթ, որով Եվրահանձնաժողովին կոչ է արվում արագացնել մի գործիքի մշակումը, որը, եվրոպացի պաշտոնյաներից մեկի բնորոշմամբ, Բրյուսելին թույլ կտա «24 ժամվա ընթացքում կտրել Չինաստանը եվրոպական շուկայից»։
Barkin-ի գնահատմամբ՝ այդ միջոցները կարող են նման լինել ԱՄՆ Section 301 մաքսատուրքային մոտեցմանը։ Չինաստանի առևտրի նախարարությունն էլ իր հայտարարությունում նշել է, որ արձագանքում է հենց «301»-ի ոճի գործիքների կիրառման եվրոպական քննարկումներին։
Թեև 2020-ից ASEAN-ը շրջանցել է ԵՄ-ին և դարձել Չինաստանի ամենախոշոր ապրանքաշրջանառության գործընկերը, ԵՄ-ի առևտրային դեֆիցիտը Չինաստանի հետ շարունակում է մնալ աշխարհում ամենամեծը և վերջերս գերազանցել է նույնիսկ ԱՄՆ-ի ցուցանիշը։ Իսկ եթե հաշվարկում ներառվեն նաև ծառայությունները, ԵՄ-ն նշում է, որ անցած տարի Չինաստանի հետ համատեղ առևտուրը հասել է 880 միլիարդ եվրոյի՝ գրեթե 1 տրիլիոն դոլարի։
Աղբյուր՝ www.cnbc.com
