Վարչապետ Նիկոլ Փաշինյանի գլխավորությամբ կառավարությունում տեղի է ունեցել խորհրդակցություն, որի ընթացքում քննարկվել են պետական ակտիվների կառավարմանն առնչվող հարցերը։ Այդ մասին հայտնել է Կառավարության լրատվական ծառայությունը։
Ըստ հաղորդագրության՝ Պետական գույքի կառավարման կոմիտեի նախագահ Դավիթ Թավադյանը ներկայացրել է պետական ակտիվների թվայնացման ընթացքը, ինչպես նաև կառավարման և կարգավորման նոր մոտեցումների ներդրման վերաբերյալ մանրամասներ։ Քննարկվել են նաև թափանցիկության և հաշվետվողականության բարձրացման, ինչպես նաև պետական ակտիվների կառավարման կազմակերպական կառուցվածքի հարցերը։
Խորհրդակցության ընթացքում անդրադարձ է եղել պետական ակտիվների նպատակային, արդյունավետ և թափանցիկ օգտագործմանն ուղղված քայլերին։ Մասնակիցները ներկայացրել են տարբեր դիտարկումներ և առաջարկություններ՝ համակարգի բարելավման վերաբերյալ։
Քննարկումը ամփոփելիս Նիկոլ Փաշինյանը կարևորել է արդյունավետ կառավարման այնպիսի մոդելի ձևավորումը, որը կապահովի ակտիվների հստակ հաշվառում, ընթացիկ գնահատում, բյուջեի համար կայուն եկամուտներ և աջակցություն երկրի տնտեսական զարգացմանը։ Վարչապետը հանձնարարել է շարունակել աշխատանքը այդ մոդելի ձևավորման ուղղությամբ։
Աղբյուր՝ hetq.am
