Հայաստանում իրացվելիության պակաս չկա, և ֆինանսական ռեսուրսների առումով շուկայում նույնիսկ ավելցուկ կա։ Այդ մասին սեպտեմբերի 15-ին կայացած ասուլիսում հայտարարել է ՀՀ կենտրոնական բանկի նախագահ Մարտին Գալստյանը՝ անդրադառնալով այն գնահատականներին, թե կապիտալի շուկայի զարգացման հիմնական խոչընդոտներից մեկը ոչ բավարար իրացվելիությունն է։
Գալստյանի խոսքով՝ Հայաստանում «շատ-շատ շատ» փող կա, և այն ընկերությունները, որոնք պատրաստ են ներգրավել ֆինանսավորում, ունեն հավակնոտ ծրագրեր և գործում են բաց ու թափանցիկ, պետք է դիմեն ու օգտագործեն առկա հնարավորությունները։ Նրա ձևակերպմամբ՝ շուկայում կա և՛ փող, և՛ անհրաժեշտ ենթակառուցվածք, ու բիզնեսը պետք է օգտվի դրանից՝ իր նախագծերն իրականացնելու համար։
ԿԲ նախագահի գնահատմամբ՝ տնտեսության ֆինանսավորումը պարտադիր չէ կառուցել միայն բանկային վարկավորման շուրջ։ Նա նշել է, որ մասնավոր հատվածի բազմաթիվ ներկայացուցիչներ արդեն սկսել են պարտատոմսերի թողարկում, իսկ ցանկության դեպքում կարող են օգտվել նաև այլ պարտքային գործիքներից։
«Եթե նրանք ուզում են գնալ պարտատոմսերի, պարտքային գործիքների ճանապարհով, կարող են գնալ. կան էմիտենտներ, կան անդերրայթերներ, կա բորսա, և կա շատ մեծ իրացվելիություն։ Եթե նրանք ցանկանան գնալ բաժնային ֆինանսավորման ներգրավման ճանապարհով, դա նույնպես հնարավոր է», - ասել է նա։
Միաժամանակ Գալստյանը շեշտել է, որ շուկա դուրս եկող նախագծերը պետք է լինեն որակյալ, քանի որ ներդրողների պահանջները փոխվում են, իսկ իրենք՝ ներդրողները, ավելի բարձր մակարդակի են հասնում։ Նրա խոսքով՝ նրանք ակնկալում են աուդիտ, վարկանիշ, որոշակի աստիճանի բացություն և մասնագիտական երկխոսություն վարելու կարողություն։
ԿԲ նախագահի խոսքով՝ հենց այս հարթությունում դեռ խնդիրներ կան։ Այսպիսով, ըստ նրա, Հայաստանի կապիտալի շուկայի զարգացման հարցում առանցքային սահմանափակումը ոչ այնքան փողի պակասն է, որքան այն, թե արդյոք բիզնեսը համապատասխանում է ներդրողների նոր պահանջներին։
Ավելի վաղ Landmark Capital ներդրումային ընկերության գլխավոր գործադիր տնօրեն Գոռ Գևորգյանը «ԱՌԿԱ» գործակալությանը տված հարցազրույցում նշել էր, որ Հայաստանի տնտեսության ֆինանսավորումը դեռ մեծապես հիմնված է բանկային վարկավորման վրա։ Նա կապիտալի շուկայի հետագա զարգացման հիմնական սահմանափակումներից մեկը համարել էր ոչ բավարար իրացվելիությունը։
Աղբյուր՝ armbanks.am
