Երևանում կայացած նիստում «Հայաստան» համահայկական հիմնադրամի հոգաբարձուների խորհուրդը հաստատել է հիմնադրամի զարգացման նոր ռազմավարական ուղղությունները։
Հիմնադրամի գործադիր տնօրեն Արամայիս Ավետիսյանը խորհրդին ներկայացրել է եռամյա զարգացման ռազմավարությունը, դրա իրականացման ճանապարհային քարտեզը և ծրագրային հիմնական առաջնահերթությունները։
Ներկայացված մոտեցումը կառուցված է չորս փոխկապակցված ուղղությունների շուրջ՝ ռազմավարական զարգացում, կազմակերպական զարգացում, Հայաստանի և Սփյուռքի միջև համագործակցության էկոհամակարգի զարգացում, ինչպես նաև ֆինանսական և գործառնական կառավարման արդյունավետության բարձրացում։
Նիստի ընթացքում քննարկվել է նաև հիմնադրամի գործունեության 2027-2029 թվականների բյուջեի նախագիծը։
Հիմնադրամի մամուլի ծառայության հաղորդագրության համաձայն՝ ընդունված որոշումներով «Հայաստան» համահայկական հիմնադրամը մտնում է ինստիտուցիոնալ զարգացման նոր փուլ՝ կենտրոնանալով կազմակերպական կարողությունների ամրապնդման, պատասխանատվության հստակ բաշխման, թափանցիկ կառավարման և կայուն ազդեցություն ապահովող ծրագրերի իրականացման վրա։
Աղբյուր՝ arminfo.info
