ԱՄՆ Աշխատանքի նախարարությունը հայտարարել է, որ դադարեցնում է Microsoft-ի և Adobe-ի մասնակցությունը Permanent Labor Certification ծրագրին։ Գերատեսչության ղեկավար Keith Sonderling-ը ասել է, որ որոշումը կայացվել է այն պահին, երբ վարչակազմը շարունակում է խստացնել ներգաղթի և օտարերկրյա աշխատուժի ներգրավման կանոնները նոյեմբերյան միջանկյալ ընտրություններից առաջ։
Sonderling-ի խոսքով՝ նախարարությունը նաև չի ընդունի և չի մշակի ծրագրի շրջանակում նոր հայտեր մի շարք այլ ընկերություններից, այդ թվում՝ Cognizant, Infosys, Capgemini, Tata, Wipro և HCL։ Նրա խոսքով՝ Microsoft-ը և Adobe-ը ծրագրից հեռացվել են «մի քանի ակտիվ դաշնային քննության» պատճառով։
Նախարարը նշել է, որ 2009 թվականից ի վեր միայն այս ընկերությունները միասին գրեթե 3 միլիոն օտարերկրյա աշխատողի համար դիմումներ են ներկայացրել, ստացել են ավելի քան 230,000 H-1B վիզայի հաստատում և ավելի քան 100,000 մշտական աշխատանքային սերտիֆիկացում։ Նրա պնդմամբ՝ սա հարյուր հազարավոր աշխատատեղեր է արժեցել ամերիկացի աշխատողներին։
ԱՄՆ փոխնախագահ JD Vance-ը առանձնապես քննադատել է Microsoft-ին՝ հիշեցնելով 2025 թվականի 6,000 կրճատումները։ Նա պնդել է, որ ընկերությունը այդ աշխատակիցներին «փոխարինել» է H-1B վիզաներով աշխատողներով, և հայտարարել է, որ Microsoft-ին չեն թույլատրի դիմել մշտական կացության այս ծրագրով, մինչև ընկերությունը չապացուցի, որ առաջնահերթություն է տալիս ամերիկացի աշխատողներին։
Microsoft-ը պատասխանել է, որ ԱՄՆ-ում իր աշխատակիցների ճնշող մեծամասնությունը ամերիկացիներ են։ Ընկերության տվյալներով՝ անցած ֆինանսական տարում ներկայացված մոտ 6,000 H-1B դիմումներից 80%-ը վերաբերում էր արդեն աշխատող անձանց կարգավիճակի երկարաձգմանը կամ փոփոխությանը։ Ընկերությունը նաև նշել է, որ դիմումներ է ներկայացնում միայն այն մասնագետների համար, որոնք համապատասխանում են այս վիզային կարգի խիստ պահանջներին։
Հայտարարությունը հնչել է այն նույն միջոցառման ընթացքում, որտեղ ԱՄՆ նախագահ Donald Trump-ը նախատեսել էր National Medal of Science հանձնել Microsoft-ի գլխավոր տնօրեն Satya Nadella-ին և տեխնոլոգիական ոլորտի այլ ղեկավարների։ Նրանց թվում են նաև Nvidia-ի գլխավոր տնօրեն Jensen Huang-ը, SpaceX-ի գլխավոր տնօրեն Elon Musk-ը և Advanced Micro Devices-ի գլխավոր տնօրեն Lisa Su-ն։
Աղբյուր՝ www.cnbc.com
