ԱՄՆ իշխանությունները քաղաքացիական հայց են ներկայացրել՝ պահանջելով բռնագրավել 61 մլն դոլար արժողությամբ կրիպտոակտիվներ, որոնք, ըստ քննության, կապված են իրանական նավթի վաճառքից ստացված միջոցների հետ։ CNBC-ի փոխանցմամբ՝ գործը վերաբերում է պատժամիջոցները շրջանցելով իրականացված գործարքներին։
Նյու Յորքի Հարավային շրջանի դատախազության տվյալներով՝ չինական Blessed Trust և Hexa Whale ընկերությունները Binance կրիպտոբորսայում բացված հաշիվներով, ենթադրաբար, լվացել են հումքի ստվերային առևտրից գոյացած եկամուտները։ Դատախազությունում պնդում են, որ այդ ցանցով օրինականացվել է ավելի քան 1.5 մլրդ դոլար, որը հետագայում ուղղվել է իրանական ռազմական կառույցների ֆինանսավորմանը։
Հրապարակման մեջ նշվում է, որ Չինաստանը շարունակում է մնալ իրանական նավթի խոշորագույն գնորդներից մեկը։ 2025 թվականին նրա բաժին է ընկել Իրանից նավթի մատակարարումների ավելի քան 80%-ը, ինչը միջինում կազմել է օրական 1.4 մլն բարել։
Վաշինգտոնը դեռ ապրիլին սահմանափակումներ էր կիրառել չինական անկախ նավթավերամշակող գործարանի նկատմամբ և ֆինանսական հաստատություններին զգուշացրել Իրանից հումք վերամշակող ձեռնարկությունների հետ համագործակցության ռիսկերի մասին։ Նոր հայցը ցույց է տալիս, որ ԱՄՆ-ն շարունակում է ուժեղացնել վերահսկողությունը նաև թվային ակտիվների օգտագործմամբ հնարավոր հաշվարկների նկատմամբ։
Սեպտեմբերի 1-ին ևս ԱՄՆ իշխանությունները հայտնել էին մեկ այլ գործողության մասին՝ բռնագրավելով ավելի քան 560 հազար դոլար արժողությամբ կրիպտոարժույթ և արգելափակելով «ՀԱՄԱՍ» խմբավորման առցանց ենթակառուցվածքը։ Հետաքննությունների դաշնային բյուրոն (FBI) վերահսկողության տակ էր վերցրել այն դոմեններն ու սերվերները, որոնք, ըստ քննիչների, օգտագործվում էին գաղտնագրված չաթերի միջոցով միջոցներ հավաքելու և համակիրներ ներգրավելու համար։ Թվային ակտիվների հետագծումն ու առգրավումը կատարվել էին 2025 թվականին տրամադրված օրդերների հիման վրա։
Աղբյուր՝ b24.am
