Ռուսաստանի տնտեսական սահմանափակումներին զուգահեռ վերջին տարիներին փոքր քայլերով ոտքի կանգնող գյուղատնտեսության ցուցանիշներն այս տարվա առաջին կեսին դարձյալ նվազել են՝ գրեթե 12 տոկոսանոց կրճատում կա:
Ըստ պաշտոնական վիճակագրության՝ Հայաստանի նկատմամբ ռուսական սահմանափակումները համընկել են այս տարվա առաջին կիսամյակի ընթացքում պտուղ-բանջարեղենի համեմատաբար ավելի փոքր ծավալի բերքահավաքին և, գուցե, նաև այս հանգամանքն էր պատճառը, որ միրգ-բանջարեղենի ներկրման սահմանափակումներն անցած ամիսներին լուրջ ցնցումներ չառաջացրեցին:
Ծիրանն, օրինակ, այդպես էլ չէժանացավ, սակայն առաջիկայում խաղողի բերքահավաքն է, դեղձն էլ նոր-նոր է հասնում:
Խնդիրներն ի՞նչ մասշտաբների կհասնեն, առայժմ հնարավոր չէ ասել, բայց Արմավիրի այգեգործներն արդեն ոտքի են ելել, պնդում են՝ դեղձն իրացնել չեն կարողանում:
Այգեգործներին մեկ կիլոգրամ դեղձի համար 100 դրամ են առաջարկում, News.am-ի հետ զրույցում նրանք պնդում էին՝ իրենց ամբողջ տարվա աշխատանքի համար փոքր գումար է:
Արմավիրի համայնքապետի վստահեցումները, թե գործադիրը զբաղվում է այս խնդրով այգեգործներին չեն համոզում:
Արդեն փաստ է՝ Ռուսաստանի քայլերը համընկան Հայաստանում աճած ավելի մեծ քանակի ծաղիկների հետ:
Հունվար-հունիս ամիսներին գրեթե 120 միլիոն հատ ծաղիկ են հավաքել, անցած տարվա նույն ժամանակահատվածում քանակը գրեթե 9 միլիոնով պակաս էր:
Լուրջ խնդիրներ ունեն նաև լոլիկ արտադրողները, վիճակագրությունը փաստում է, որ այլ շուկաներ գտնելու գործադիրի քայլերը ռուսական շուկան չեն փոխարինել:
Մայիսից սկսած և՛ ծաղիկների, և՛ լոլիկի արտահանումը գումարային արտահայտությամբ ընդհուպ կրկնակի նվազել է:
Գյուղատնտեսներից մեկն ասում է.- «Հիմա ինչ ունեմ, արդեն բանկրոտ ջերմոց ա, ես բանկրոտ եմ»:
Արտահանման սահմանափակումները ծաղիկների, լոլիկի գների էական նվազման են հանգեցրել:
Ռուսաստանի սահմանափակումների տակ հայտնված ապրանքներից նաև թարմ ձկան գինն է էապես նվազել:
Այս հուլիսին տարեսկզբի համեմատ գնանկումը գրեթե 12 տոկոսի է հասել:
Չնայած այս սահմանափակումներին՝ Ռուսաստանը շարունակում է մնալ Հայաստանի ամենախոշոր առևտրային գործընկերն ու արտահանումների հիմնական ուղղությունը:
Այս տարվա առաջին կեսին Հայաստանից ընդհանուր գրեթե 3.5 միլիարդ դոլարի ապրանք են արտահանել, շուրջ 36 տոկոսը կամ ավելի քան 1.2 միլիարդ դոլարը ռուսական շուկա է մտել:
Միայն հունիս ամսին՝ երբ Ռուսաստանի սահմանափակումներն արդեն ուժի մեջ էին, Հայաստանից գրեթե 200 միլիոն դոլարի ապրանք է ռուսական շուկա մտել:
Աղբյուր՝ www.azatutyun.am
