Սննդամթերքի անվտանգության տեսչական մարմինը կասեցրել է «Վիլ ֆուդ» ՍՊ ընկերությանը պատկանող միրգ-բանջարեղենի պահածոների արտադրամասի արտադրական գործունեությունը։ Խոսքը վերաբերում է Կոտայքի մարզի Հրազդան քաղաքի Ֆիդայինների 71 հասցեում գործող արտադրամասին։
ՍԱՏՄ-ի հաղորդմամբ՝ ստուգման ընթացքում պարզվել է, որ արտադրամասում խախտվել են Մաքսային միության տեխնիկական կանոնակարգի պահանջները։ Տեսչական մարմինը նշել է, որ այդ խախտումները կարող էին ազդեցություն ունենալ սննդամթերքի անվտանգ արտադրության պայմանների վրա։
Մասնավորապես, ըստ հաղորդագրության, բնական և մեխանիկական օդափոխության միջոցների քանակը, հզորությունը, կառուցվածքն ու գործարկումը բավարար չեն եղել՝ սննդամթերքի աղտոտումը կանխելու համար։ Բացի այդ, արտադրական շինության պատերի մակերևույթները պատրաստված չեն եղել անջրանցիկ և լվացվող նյութերից։
ՍԱՏՄ-ն նաև արձանագրել է, որ առաստաղը համապատասխան վիճակում չի եղել՝ կեղտի կուտակումը, բորբոսի առաջացումը և առաստաղից մասնիկների թափվելը կանխելու համար։
Տեսչական մարմնի ղեկավարի որոշմամբ՝ արտադրամասի գործունեությունը կասեցվել է մինչև հայտնաբերված խախտումների վերացումը, ասվում է հաղորդագրությունում։
Աղբյուր՝ hetq.am
