ՕՊԵԿ-ի միջազգային զարգացման հիմնադրամը Հայաստանին տրամադրելու է 80 միլիոն եվրո վարկ, որը նախատեսված է պետական բյուջեի աջակցման համար: Հայաստանի կառավարությունը սեպտեմբերի 3-ին հաստատել է համապատասխան համաձայնագրի կնքումը:
Վարկի տրամադրման նախապայմաններից է մի շարք ոլորտներում բարեփոխումների իրականացումը, որոնք համահունչ են 170,3 միլիոն եվրո գումարի համար Հայաստանի Հանրապետության և Միջազգային վերակառուցման և զարգացման բանկի միջև կնքված վարկային համաձայնագրի քաղաքականությանը:
Այս բարեփոխումները ներառում են ներդրումների և առևտրի ազատականացում, մրցակցության խթանում, ներդրումային և մաքսային բարեփոխումներ:
Համաձայնագրի համաձայն, ՕՊԵԿ-ի հիմնադրամը պարտավորվում է տրամադրել Հայաստանի Հանրապետությանը 80 միլիոն եվրո վարկ, որի տարեկան տոկոսադրույքը կլինի 6-մսյա EURIBOR + 1,56%:
Վարկի մարումը նախատեսված է 18 տարի ժամկետով, որի ընթացքում 5 տարի կլինի արտոնյալ:
Աղբյուր՝ finport.am
