Մեծ Բրիտանիայի տնտեսությունը վերականգնման վստահ տեմպեր է ցուցադրում, սակայն հետագա աճը վտանգված է էներգակիրների բարձր գների և Մերձավոր Արևելքում աշխարհաքաղաքական լարվածության պատճառով, հայտնում է CNBC-ն:
Երկրորդ եռամսյակում Մեծ Բրիտանիայի ՀՆԱ-ն աճել է 0.4%-ով՝ տարվա առաջին երեք ամիսներին գրանցված 0.6% աճից հետո: Նույն ժամանակահատվածում կորպորատիվ ներդրումներն աճել են 1.7%-ով, ինչը զգալիորեն գերազանցել է փորձագետների սպասումները, որոնք կանխատեսում էին 0.5% անկում: Deutsche Bank-ի՝ Մեծ Բրիտանիայի հարցերով գլխավոր տնտեսագետ Սանջայ Ռաջան նշել է, որ այս ցուցանիշները թույլ են տալիս երկրին մնալ «Մեծ յոթնյակի» պետությունների շարքում ամենաարագ աճող տնտեսությունը: Միևնույն ժամանակ նա հավելել է, որ «որոշակի դանդաղումը մնում է հավանական»՝ վառելիքի արժեքի աճի՝ բնակչության եկամուտների վրա գործադրած ճնշման ֆոնին:
Ապրիլին ԱՄՀ-ն նախազգուշացրել էր, որ ԱՄՆ-ի, Իսրայելի և Իրանի միջև հակամարտությունը կարող է ավելի մեծ հարված հասցնել երկրի տնտեսական հեռանկարներին, քան մյուս զարգացած պետություններին՝ նավթի և գազի ներմուծումից Մեծ Բրիտանիայի բարձր կախվածության պատճառով: Ֆինանսների նախարարությունն արդեն վարչապետ Էնդի Բերնհեմին ներկայացրել է վատագույն սցենարը, ըստ որի՝ հաջորդ տարի տնտեսական աճը կարող է նվազել մինչև 0.3%, եթե Հորմուզի նեղուցում մատակարարումների խափանումներ առաջանան: Pictet Asset Management-ի ներկայացուցիչները նույնպես ընդգծում են, որ ներկայիս զարգացումը կենտրոնացած է ծառայությունների ոլորտում, մինչդեռ արդյունաբերական արտադրությունն ու շինարարությունն անկում են գրանցում:
Աղբյուր՝ b24.am
